ఏపీ క్రీడాకారులకు ప్రోత్సాహం.. ఒలింపిక్స్‌లో పతకాలే లక్ష్యం: కొల్లు రవీంద్ర

అమరావతి, సెప్టెంబర్ 30: ఏపీ క్రీడాకారులను అంతర్జాతీయ స్థాయిలో ప్రోత్సహించి, ఒలింపిక్ క్రీడల్లో రాష్ట్రం నుంచి పతకాలు సాధించేలా అవసరమైన సహకారం అందిస్తామని మంత్రి కొల్లు రవీంద్ర తెలిపారు. క్రీడాకారుల సంక్షేమానికి ప్రభుత్వం పలు చర్యలు చేపడుతోందని పేర్కొన్నారు. కెనడాలో జరిగిన కామన్వెల్త్ 75 కిలోల పవర్‌లిఫ్టింగ్ విభాగంలో రజత పతకం సాధించిన ఏపీ ఎక్సైజ్ కానిస్టేబుల్ చంద్రకళను మంత్రి బుధవారం సత్కరించారు. ఈ సందర్భంగా మాట్లాడుతూ.. క్రీడల్లో ప్రతిభ చూపుతున్న యువతకు ప్రభుత్వం అందిస్తున్న అవకాశాలను సద్వినియోగం చేసుకోవాలని సూచించారు. క్రీడల్లో రాణించిన వారికి ఉద్యోగాల్లో రిజర్వేషన్ల ద్వారా కూడా ప్రభుత్వం అండగా నిలుస్తోందని తెలిపారు. ఏపీ నుంచి ఒలింపిక్ పతక విజేతలను తయారు చేయడమే లక్ష్యంగా క్రీడాకారులను ప్రోత్సహిస్తున్నామని మంత్రి చెప్పారు. క్రీడా రంగంలో ప్రతిభకు తగిన శిక్షణ, అవకాశాలు అందితే అంతర్జాతీయ స్థాయిలో మరిన్ని విజయాలు సాధించే అవకాశం ఉంటుందని ఆయన పేర్కొన్నారు. వైసీపీపై కొల్లు రవీంద్ర విమర్శలు ఇదే సందర్భంగా గత వైసీపీ ప్రభుత్వంపై కొల్లు రవీంద్ర విమర్శలు చేశారు. మెగా డీఎస్సీలో ఉద్యోగాలు పొందిన వారిని వైసీపీ నేతలు అవహేళన చేస్తున్నారని ఆరోపించారు. జగన్ హయాంలో క్రీడాకారులు, ఉపాధ్యాయులపై దాడులు జరిగాయని, క్రీడాకారుల జీవితాలతో వైసీపీ నేతలు ఆడుకున్నారని విమర్శించారు. గత ప్రభుత్వ పాలనపై ప్రజలు అప్రమత్తంగా ఉండాలని ఆయన సూచించారు. జ్యోతి సురేఖకు శాప్ చైర్మన్ అభినందనలు మరోవైపు, ఏషియన్ గేమ్స్ 2026లో భారత మహిళల కాంపౌండ్ ఆర్చరీ జట్టు స్వర్ణ పతకం సాధించడంపై ఏపీ శాప్ చైర్మన్ రవి నాయుడు అభినందనలు తెలిపారు. భారత్ ఫైనల్లో చైనాను 238-234తో ఓడించింది. జట్టులో ఏపీకి చెందిన వెన్నం జ్యోతి సురేఖతో పాటు చికితా తనపర్తి, ప్రతికా ప్రదీప్ ఉన్నారు. ఈ విజయంతో జ్యోతి సురేఖకు ఏషియన్ గేమ్స్‌లో నాలుగో స్వర్ణ పతకం లభించింది. అంతర్జాతీయ ఆర్చరీలో ఆమె సాధిస్తున్న విజయాలు ఏపీ క్రీడాకారులకు స్ఫూర్తినిస్తున్నాయని రవి నాయుడు పేర్కొన్నారు.