ఏపీ పర్యాటకానికి కేంద్రం అండ.. పర్యాటక ప్రాంతాలకు విమాన సర్వీసులు పెంపు

విశాఖపట్నం, సెప్టెంబరు 10: అభివృద్ధి చెందిన భారత్‌ లక్ష్య సాధనలో పర్యాటక రంగం కీలక పాత్ర పోషిస్తోందని పౌర విమానయాన శాఖ మంత్రి రామ్మోహన్‌ నాయుడు అన్నారు. ఆంధ్రప్రదేశ్‌లో పర్యాటక రంగం అభివృద్ధికి కేంద్ర ప్రభుత్వం పూర్తి సహకారం అందిస్తుందని తెలిపారు. పర్యాటక ప్రాంతాలకు కనెక్టివిటీ పెంచేందుకు విమాన సర్వీసులను మరింత విస్తరించనున్నట్లు చెప్పారు. విశాఖపట్నంలోని నోవోటెల్‌ హోటల్‌లో గురువారం జరిగిన ఇండియన్‌ అసోసియేషన్‌ ఆఫ్‌ టూర్‌ ఆపరేటర్స్‌ (ఐఏటీఓ) 41వ జాతీయ సదస్సును కేంద్ర మంత్రి రామ్మోహన్‌ నాయుడు, రాష్ట్ర పర్యాటక శాఖ మంత్రి కందుల దుర్గేశ్‌తో కలిసి ప్రారంభించారు. ఈ సందర్భంగా రామ్మోహన్‌ నాయుడు మాట్లాడుతూ.. పర్యాటక ప్రాంతాలకు మెరుగైన విమాన కనెక్టివిటీ కల్పించడం ద్వారా దేశీయ, అంతర్జాతీయ పర్యాటకుల రాకను పెంచే అవకాశం ఉందన్నారు. ముఖ్యంగా ఉత్తరాంధ్రలోని పర్యాటక ప్రాంతాలకు మరింత ప్రాచుర్యం కల్పించేందుకు టూర్‌ ఆపరేటర్లు కృషి చేయాలని సూచించారు. ఉడాన్‌ పథకం ద్వారా 100 విమానాశ్రయాలను అనుసంధానం చేస్తూ రూ.28,840 కోట్లను వెచ్చిస్తున్నామని కేంద్ర మంత్రి తెలిపారు. విమాన కనెక్టివిటీ విస్తరణ పర్యాటక రంగ అభివృద్ధికి కూడా దోహదపడుతుందని పేర్కొన్నారు. రాష్ట్ర పర్యాటక శాఖ మంత్రి కందుల దుర్గేశ్‌ మాట్లాడుతూ.. ఏపీలో పర్యాటక రంగాన్ని ఆరు అంచెల విధానంలో అభివృద్ధి చేస్తున్నట్లు తెలిపారు. గత రెండేళ్లలో రాష్ట్రానికి రూ.20 వేల కోట్ల పర్యాటక పెట్టుబడులు వచ్చినట్లు వెల్లడించారు. వెల్‌నెస్‌, ఎకో, అడ్వెంచర్‌, హెలీ, సీప్లేన్‌ టూరిజం వంటి కొత్త విభాగాలకు ప్రాధాన్యం ఇస్తున్నట్లు చెప్పారు. గోదావరి పుష్కరాలను దృష్టిలో ఉంచుకుని ఏడు ప్రత్యేక పర్యాటక సర్క్యూట్లను ఏర్పాటు చేస్తున్నట్లు మంత్రి తెలిపారు. రాష్ట్రంలోని పర్యాటక వనరులు, ప్రభుత్వం అందిస్తున్న ప్రోత్సాహకాలు, మౌలిక వసతులపై ఏపీ పర్యాటక శాఖ ప్రధాన కార్యదర్శి ఎస్‌.ఎస్‌. రావత్‌ వివరించారు. ఈ సందర్భంగా గోదావరి పుష్కరాల ప్రాధాన్యాన్ని వివరించే ‘ది గోదావరి కాల్స్‌’ పోస్టర్‌ను మంత్రులు ఆవిష్కరించారు. ఐఏటీఓ మాన్యువల్‌ బుక్‌ను విడుదల చేశారు. కార్యక్రమంలో పలువురు పర్యాటక శాఖ, ప్రభుత్వ అధికారులు పాల్గొన్నారు.