ఇంకెప్పుడు జట్టుకు అండగా నిలుస్తావు?.. బాబర్ ఆజమ్‌పై బాసిత్ అలీ తీవ్ర విమర్శలు

ఇంటర్నెట్ డెస్క్: పాకిస్థాన్ స్టార్ బ్యాటర్ బాబర్ ఆజమ్‌పై ఆ దేశ మాజీ క్రికెటర్ బాసిత్ అలీ తీవ్రస్థాయిలో విమర్శలు గుప్పించారు. క్లిష్ట పరిస్థితుల్లో జట్టును ఆదుకోవాల్సిన కీలక ఆటగాడు పదేపదే విఫలమవుతుండటంపై ఆయన అసంతృప్తి వ్యక్తం చేశారు. అభిమానులు, సోషల్ మీడియాలో బాబర్‌ను గొప్ప ఆటగాడిగా అభివర్ణించడం వేరు.. కానీ మైదానంలో కీలక సమయాల్లో జట్టుకు అండగా నిలవడం వేరని వ్యాఖ్యానించారు. ఇంగ్లండ్‌తో లార్డ్స్ వేదికగా జరిగిన రెండో టెస్టులో పాకిస్థాన్ ఓటమి అనంతరం బాసిత్ అలీ ఈ వ్యాఖ్యలు చేశారు. బాబర్ ఆజమ్‌ ఇటీవల టెస్టుల్లో ఆశించిన స్థాయిలో రాణించలేకపోతున్నాడని ఆయన విమర్శించారు. 2026లో ఇప్పటివరకు ఎనిమిది టెస్టులు ఆడిన బాబర్ కేవలం 322 పరుగులు మాత్రమే చేసినట్లు గణాంకాలు చెబుతున్నాయి. టెస్టుల్లో సెంచరీ సాధించి దాదాపు నాలుగేళ్లు కావడం కూడా అతడి ఫామ్‌పై చర్చకు దారితీస్తోంది. కీలక సమయంలో రాణించాలన్న బాసిత్ గొప్ప ఆటగాడిగా గుర్తింపు పొందాలంటే కేవలం వ్యక్తిగత రికార్డులు సరిపోవని, జట్టు కష్టాల్లో ఉన్నప్పుడు బాధ్యత తీసుకుని ఆడాలని బాసిత్ అలీ అభిప్రాయపడ్డారు. దేశం మొత్తం ఒక ఆటగాడిపై ఆశలు పెట్టుకున్న సమయంలో కీలక ఇన్నింగ్స్ ఆడలేకపోతే అతడిని గొప్ప ఆటగాడిగా ఎలా పరిగణిస్తామని ప్రశ్నించారు. బాబర్ ఆజమ్‌ను ఉద్దేశిస్తూ.. టెస్టుల్లో సెంచరీ కోసం ఇంతకాలం ఎదురుచూడాల్సి రావడం బాధాకరమని వ్యాఖ్యానించారు. ముఖ్యంగా జట్టు ఒత్తిడిలో ఉన్నప్పుడు అనవసర షాట్లతో వికెట్లు కోల్పోవడం వంటి అంశాలపై ఆయన తీవ్ర అసంతృప్తి వ్యక్తం చేశారు. లార్డ్స్ టెస్టులో నిరాశ ఇంగ్లండ్‌తో జరిగిన లార్డ్స్ టెస్టులో బాబర్ ఆజమ్‌ ప్రదర్శన నిరాశపరిచింది. గాయం కారణంగా లీడ్స్ టెస్టుకు దూరమైన అనంతరం తిరిగి జట్టులోకి వచ్చిన అతడు.. లార్డ్స్‌లో రెండు ఇన్నింగ్స్‌ల్లో 8, 6 పరుగులకే పెవిలియన్ చేరాడు. అయితే, ఇంగ్లండ్‌లో గతంలో బాబర్‌కు మంచి రికార్డు ఉంది. రెండో టెస్టుకు ముందు అక్కడ ఆరు ఇన్నింగ్స్‌ల్లో 65.75 సగటుతో పరుగులు సాధించిన అతడు మూడు అర్ధసెంచరీలు కూడా నమోదు చేశాడు. ఇంగ్లండ్‌పై మొత్తంగా అతడి రికార్డు కూడా మెరుగ్గానే ఉంది. అలాంటి పరిస్థితుల్లో లార్డ్స్ టెస్టులో కీలక సమయంలో బాబర్ విఫలమవడం పాకిస్థాన్ జట్టు ఓటమిపై ప్రభావం చూపిందనే చర్చకు దారితీసింది. ప్రస్తుతం బాబర్ ఆజమ్ ఎదుర్కొంటున్న అసలు సవాలు కేవలం పరుగులు చేయడమే కాదు.. కీలక మ్యాచ్‌లు, ఒత్తిడి పరిస్థితుల్లో జట్టును ముందుండి నడిపించగలడా అన్న ప్రశ్నకు తన బ్యాట్‌తో సమాధానం చెప్పడమే.