చెన్నూర్‌లో గంజాయి పట్టివేత.. ఇద్దరు అరెస్ట్

చెన్నూర్ పట్టణ సమీపంలోని 63వ జాతీయ రహదారిపై పోలీసులు నిర్వహించిన వాహన తనిఖీల్లో గంజాయి తరలిస్తున్న ఇద్దరు యువకులు పట్టుబడ్డారు. అస్నాద్ ఎక్స్‌ రోడ్డు వద్ద టాస్క్‌ఫోర్స్‌, చెన్నూర్ పట్టణ పోలీసులు సంయుక్తంగా తనిఖీలు చేపట్టారు. మహారాష్ట్రలోని గడ్చిరోలి జిల్లా తొడ్సీ గ్రామం నుంచి వేములవాడ వైపు నంబర్‌ ప్లేట్‌ లేని KTM బైక్‌పై వెళ్తున్న ఇద్దరు యువకులను పోలీసులు అనుమానంతో ఆపి తనిఖీ చేశారు. వారి వద్ద 1 కిలో 20 గ్రాముల గంజాయి గుర్తించి స్వాధీనం చేసుకున్నారు. దీంతో పాటు ఓ సెల్‌ఫోన్‌, రూ.2,000 నగదు, బైక్‌, ఏటీఎం కార్డును పోలీసులు స్వాధీనం చేసుకున్నారు. పట్టుబడిన గంజాయి విలువ సుమారు రూ.15 వేలుగా పోలీసులు తెలిపారు. పోలీసుల విచారణలో నిందితులు గత ఏడాది కాలంగా గంజాయి వినియోగానికి అలవాటు పడ్డారని, మహారాష్ట్రలో గుర్తుతెలియని వ్యక్తుల నుంచి తక్కువ ధరకు గంజాయి కొనుగోలు చేసి, కొంత వినియోగించడంతో పాటు మిగిలినదాన్ని వేములవాడ పరిసర ప్రాంతాల్లో అధిక ధరకు విక్రయిస్తున్నట్లు వెల్లడైనట్లు పోలీసులు తెలిపారు. ఇటీవల రూ.4 వేలతో గంజాయి కొనుగోలు చేసి వేములవాడకు తరలిస్తుండగా టాస్క్‌ఫోర్స్‌ పోలీసులు, చెన్నూర్ పట్టణ సీఐ, ఎస్‌ఐ సంయుక్తంగా చేపట్టిన తనిఖీల్లో పట్టుబడ్డారని పేర్కొన్నారు. ఇద్దరిపై కేసు నమోదు చేసి కోర్టులో హాజరుపరిచిన అనంతరం రిమాండ్‌కు తరలించారు. గంజాయి సరఫరా మూలాలను గుర్తించే దిశగా పోలీసులు దర్యాప్తు కొనసాగిస్తున్నారు. మహారాష్ట్రలోని తొడ్సీ గ్రామానికి చెందిన సరఫరాదారుడిని కూడా అదుపులోకి తీసుకుని, ఉన్నతాధికారుల ఆదేశాల మేరకు పీడీ యాక్ట్‌ నమోదు చేసే అవకాశం ఉందని పోలీసులు తెలిపారు. గంజాయి వినియోగం, రవాణా, విక్రయాలకు పాల్పడేవారిపై కఠిన చర్యలు తీసుకుంటామని హెచ్చరించారు.