కాంగ్రెస్‌లో సంస్థాగత మార్పులకు కసరత్తు.. కీలక పదవులపై రాహుల్‌ దృష్టి

న్యూఢిల్లీ, సెప్టెంబరు 10: కాంగ్రెస్‌ పార్టీలో సంస్థాగతంగా కీలక మార్పులకు కసరత్తు జరుగుతున్నట్లు సంకేతాలు కనిపిస్తున్నాయి. పార్టీ అగ్రనేత రాహుల్‌ గాంధీ ఆలోచనలకు అనుగుణంగా ఏఐసీసీ స్థాయిలో కొత్త నియామకాలు, బాధ్యతల మార్పులకు రంగం సిద్ధమవుతున్నట్లు పార్టీ వర్గాల్లో చర్చ జరుగుతోంది. ఏఐసీసీ కార్యదర్శుల ఎంపికపై దృష్టి ఏఐసీసీలో కార్యదర్శులుగా బాధ్యతలు అప్పగించేందుకు రాహుల్‌ గాంధీ పలువురు నేతలను ఇంటర్వ్యూ చేస్తున్నట్లు సమాచారం. సంస్థాగతంగా పార్టీని మరింత చురుగ్గా నడిపించేందుకు కొత్త ముఖాలకు అవకాశం కల్పించే దిశగా ఈ ఎంపికలు సాగుతున్నట్లు తెలుస్తోంది. అదే సమయంలో పార్టీ ఎన్నికల నిర్వహణ వ్యవస్థను కూడా పునర్వ్యవస్థీకరించే అవకాశం ఉందని పార్టీ వర్గాలు చెబుతున్నాయి. ఇందుకోసం ప్రత్యేకంగా ఎన్నికల నిర్వహణ కమిటీని ఏర్పాటు చేసి, దానికి ప్రియాంకా గాంధీ వాద్రాను చైర్మన్‌గా నియమించే అవకాశాలు ఉన్నట్లు ప్రచారం జరుగుతోంది. ఖర్గే స్థానంలో వేణుగోపాల్‌? కాంగ్రెస్‌ అధ్యక్షుడు మల్లికార్జున ఖర్గే పదవీకాలంపై కూడా పార్టీలో చర్చ జరుగుతున్నట్లు సమాచారం. ఏప్రిల్‌లో ఉత్తరప్రదేశ్‌, ఉత్తరాఖండ్‌, పంజాబ్‌ ఎన్నికల అనంతరం ఖర్గే పదవి నుంచి తప్పుకునే అవకాశం ఉందని పార్టీ వర్గాల్లో ప్రచారం సాగుతోంది. ఆయన స్థానంలో ప్రస్తుతం సంస్థాగత వ్యవహారాల ప్రధాన కార్యదర్శిగా ఉన్న కేసీ వేణుగోపాల్‌ను పార్టీ జాతీయ అధ్యక్షుడిగా నియమించే అవకాశమున్నట్లు తెలుస్తోంది. అయితే ఈ మార్పులపై కాంగ్రెస్‌ నుంచి అధికారిక ప్రకటన రావాల్సి ఉంది. తెలంగాణ ఇన్‌చార్జి మార్పుపై చర్చ తెలంగాణ కాంగ్రెస్‌ వ్యవహారాల ఇన్‌చార్జిగా ఉన్న మీనాక్షి నటరాజన్‌ స్థానంలో కూడా కొత్త వ్యక్తిని నియమించే అవకాశం ఉన్నట్లు పార్టీ వర్గాల్లో చర్చ జరుగుతోంది. విదేశాల్లో స్టడీ టూర్‌కు వెళ్లాలనే ఆమె ఆసక్తి నేపథ్యంలో ఈ మార్పు ఉండొచ్చని సమాచారం. అదేవిధంగా పార్టీ ప్రధాన కార్యదర్శులు, వివిధ రాష్ట్రాల ఇన్‌చార్జుల నియామకాల్లో కూడా భారీ మార్పులు ఉండవచ్చని ప్రచారం జరుగుతోంది. ప్రస్తుతం బాధ్యతలు నిర్వహిస్తున్న పలువురు ఇన్‌చార్జులను తప్పించి, కొత్తవారికి అవకాశం కల్పించే అవకాశం ఉందని తెలుస్తోంది. అక్టోబర్‌ నాటికి జిల్లా స్థాయి పునర్వ్యవస్థీకరణ ఇక రాష్ట్ర స్థాయి మార్పులతో పాటు పార్టీ జిల్లా స్థాయి సంస్థాగత నిర్మాణంపైనా అధిష్ఠానం దృష్టి పెట్టింది. అక్టోబర్‌ చివరి నాటికి వివిధ రాష్ట్రాల్లో జిల్లా కాంగ్రెస్‌ అధ్యక్షుల నియామక ప్రక్రియ పూర్తవుతుందని కేసీ వేణుగోపాల్‌ ఇప్పటికే ప్రకటించారు. మొత్తంగా చూస్తే.. కాంగ్రెస్‌లో ఏఐసీసీ నుంచి రాష్ట్రాలు, జిల్లాల వరకు సంస్థాగత ప్రక్షాళనకు కసరత్తు జరుగుతున్నట్లు సంకేతాలు కనిపిస్తున్నాయి. అయితే ప్రస్తుతం ప్రచారంలో ఉన్న అధ్యక్ష మార్పు, ఎన్నికల కమిటీ, రాష్ట్రాల ఇన్‌చార్జుల మార్పులపై తుది నిర్ణయాలు అధికారికంగా వెలువడాల్సి ఉంది.