రికార్డు స్థాయికి రాగి ధర.. టన్నుకు 14,737 డాలర్లు

న్యూఢిల్లీ: అంతర్జాతీయ మార్కెట్‌లో రాగి ధరలు భారీగా పెరుగుతున్నాయి. లండన్‌ మెటల్‌ ఎక్స్ఛేంజ్‌ (ఎల్‌ఎంఈ)లో ఈ నెలలో ఒక దశలో టన్ను రాగి ధర 14,737 డాలర్లకు చేరింది. భారత కరెన్సీలో ఇది సుమారు రూ.14.07 లక్షలు. గత ఏడాది ఇదే కాలంతో పోలిస్తే రాగి ధర దాదాపు 50 శాతం పెరిగింది. రాగి ధరల పెరుగుదలకు ప్రధానంగా సరఫరా పరిస్థితులు, అంతర్జాతీయ వాణిజ్య ఆందోళనలు కారణమవుతున్నాయని ఇండియన్‌ ప్రైమరీ కాపర్‌ ప్రొడ్యూసర్స్‌ అసోసియేషన్‌ (ఐపీసీపీఏ) తెలిపింది. ప్రపంచవ్యాప్తంగా గనుల నుంచి తవ్వి తీసే ముడి రాగి ఖనిజ ఉత్పత్తి తగ్గడం వల్ల సరఫరాపై ఒత్తిడి పెరుగుతోంది. అదే సమయంలో అమెరికా సుంకాలకు సంబంధించిన ఆందోళనలు కూడా మార్కెట్‌పై ప్రభావం చూపుతున్నాయి. సుంకాల భయంతో ముందస్తుగా పెద్దఎత్తున రాగిని దిగుమతి చేసుకునే ప్రయత్నాలు జరుగుతున్నాయని పరిశ్రమ వర్గాలు చెబుతున్నాయి. చైనా రిఫైనింగ్‌ సామర్థ్యం మరో సవాలు రాగి మార్కెట్‌లో మరో కీలక అంశంగా చైనా రిఫైనింగ్‌ సామర్థ్యం పెరగడాన్ని ఐపీసీపీఏ ప్రస్తావించింది. గనుల నుంచి వచ్చే ముడి రాగి ఉత్పత్తి తగ్గుతున్న సమయంలో రిఫైనింగ్‌ సామర్థ్యం పెరగడం వల్ల పరిశ్రమలో సరఫరా సమతుల్యతపై ఆందోళనలు మరింత పెరుగుతున్నాయి. రాగి విద్యుత్‌, ఎలక్ట్రానిక్స్‌, మౌలిక సదుపాయాలు, పునరుత్పాదక ఇంధనం వంటి అనేక రంగాలకు కీలక ముడి పదార్థం. అందువల్ల అంతర్జాతీయ మార్కెట్‌లో రాగి ధరల పెరుగుదల కొనసాగితే దాని ప్రభావం వివిధ పారిశ్రామిక రంగాల వ్యయాలపైనా పడే అవకాశం ఉంది.