జీతం స్లిప్ లేకపోయినా క్రెడిట్ కార్డు పొందొచ్చు.. ఎలా అంటే?

నెలవారీ జీతం తీసుకునే ఉద్యోగులకు క్రెడిట్ కార్డు పొందడం సాధారణంగా కొంత సులభంగా ఉంటుంది. ఇందుకు ప్రధాన కారణం.. వారి ఆదాయాన్ని నిర్ధారించేందుకు జీతం స్లిప్‌లు, బ్యాంక్ స్టేట్‌మెంట్లు వంటి పత్రాలు అందుబాటులో ఉండటమే. అయితే జీతం స్లిప్ లేని వారు క్రెడిట్ కార్డుకు అర్హులు కాదనే నిబంధన లేదు. స్వయం ఉపాధి పొందేవారు, చిన్న వ్యాపారులు, ఫ్రీలాన్సర్లు, గిగ్ వర్కర్లు కూడా కొన్ని ప్రత్యామ్నాయ పత్రాలతో క్రెడిట్ కార్డు కోసం దరఖాస్తు చేసుకోవచ్చు. బ్యాంకులు ఏం చూస్తాయి? క్రెడిట్ కార్డు దరఖాస్తును పరిశీలించే సమయంలో బ్యాంకులు కేవలం జీతం స్లిప్‌పైనే ఆధారపడవు. ముఖ్యంగా కార్డు బిల్లులను సకాలంలో చెల్లించే సామర్థ్యం దరఖాస్తుదారుడికి ఉందా? అనే అంశాన్ని పరిశీలిస్తాయి. ఇందుకోసం ఆదాయ స్థిరత్వం, బ్యాంకింగ్ లావాదేవీలు, క్రెడిట్ హిస్టరీ, ఇప్పటికే ఉన్న రుణాలు, క్రెడిట్ వినియోగం, రీపేమెంట్ రికార్డు వంటి అంశాలను పరిగణనలోకి తీసుకుంటాయి. బ్యాంక్ స్టేట్‌మెంట్‌ కూడా ఆదాయానికి ఆధారమే జీతం స్లిప్ అందుబాటులో లేని వారికి బ్యాంక్ స్టేట్‌మెంట్ ముఖ్యమైన ప్రత్యామ్నాయంగా ఉపయోగపడవచ్చు. ఖాతాలో క్రమం తప్పకుండా ఆదాయం జమ అవుతున్నట్లు, సాధారణ లావాదేవీలు జరుగుతున్నట్లు కనిపిస్తే.. దరఖాస్తుదారుడి ఆర్థిక స్థిరత్వాన్ని అంచనా వేయడానికి బ్యాంకుకు అది ఉపయోగపడుతుంది. అయితే బ్యాంక్ స్టేట్‌మెంట్‌లో డబ్బు జమ కావడం మాత్రమే క్రెడిట్ కార్డు ఆమోదానికి హామీ కాదు. సంబంధిత బ్యాంకు నిబంధనలు, దరఖాస్తుదారుడి మొత్తం క్రెడిట్ ప్రొఫైల్ ఆధారంగా తుది నిర్ణయం తీసుకుంటుంది. స్వయం ఉపాధి పొందేవారికి ఐటీఆర్, జీఎస్‌టీ రిటర్నులు ఉపయోగపడొచ్చు చిన్న వ్యాపారులు, స్వయం ఉపాధి పొందేవారు తమ ఆదాయానికి సంబంధించిన ఆదాయపు పన్ను రిటర్నులు (ITR) సమర్పించడం ద్వారా ఆర్థిక సామర్థ్యాన్ని చూపించవచ్చు. వ్యాపార స్వభావాన్ని బట్టి అవసరమైన సందర్భంలో జీఎస్‌టీ రిటర్నులు వంటి పత్రాలను కూడా ఆదాయ ఆధారంగా పరిగణించే అవకాశం ఉంటుంది. అయితే ఏ పత్రాలను అంగీకరించాలి? ఎంత ఆదాయం ఉండాలి? అనే నిబంధనలు ఒక్కో బ్యాంకు, ఒక్కో క్రెడిట్ కార్డు ఉత్పత్తిని బట్టి మారవచ్చు. అందువల్ల దరఖాస్తు చేసే ముందు సంబంధిత బ్యాంకు అర్హత నిబంధనలను తెలుసుకోవడం మంచిది. గిగ్ వర్కర్లకు డిజిటల్ చెల్లింపుల రికార్డులు ప్రస్తుతం డెలివరీ, క్యాబ్ సర్వీసులు, ఫ్రీలాన్సింగ్, ఆన్‌లైన్ సేవలు వంటి రంగాల్లో పనిచేసే గిగ్ వర్కర్ల సంఖ్య పెరుగుతోంది. వీరికి సంప్రదాయ ఉద్యోగుల మాదిరిగా శాలరీ స్లిప్ ఉండకపోవచ్చు. అయితే డిజిటల్ ప్లాట్‌ఫామ్‌ల నుంచి వచ్చే చెల్లింపుల రికార్డులు, బ్యాంక్ స్టేట్‌మెంట్లు వంటి వివరాలు ఆదాయ స్థిరత్వాన్ని చూపించేందుకు ఉపయోగపడే అవకాశం ఉంది. అయితే ప్రతి బ్యాంకు ఇటువంటి ఆదాయ రికార్డులను ఒకే విధంగా పరిగణించదు. మరో మార్గం.. ఎఫ్‌డీ ఆధారిత సెక్యూర్డ్ క్రెడిట్ కార్డు జీతం స్లిప్ లేదా ఇతర ఆదాయ పత్రాలు అందుబాటులో లేని వారికి ఫిక్స్‌డ్ డిపాజిట్ (FD) ఆధారంగా సెక్యూర్డ్ క్రెడిట్ కార్డు తీసుకోవడం మరో మార్గంగా ఉంటుంది. ఈ విధానంలో బ్యాంకులో ఎఫ్‌డీ ఉంచి, దాని ఆధారంగా క్రెడిట్ కార్డు పొందే అవకాశం ఉంటుంది. అయితే ఎఫ్‌డీ మొత్తం, అందుకు అనుగుణంగా లభించే క్రెడిట్ పరిమితి, ఇతర నిబంధనలు బ్యాంకును బట్టి మారుతాయి. క్రెడిట్ స్కోర్ కూడా కీలకమే క్రెడిట్ కార్డు ఆమోదంలో ఆదాయ రుజువుతో పాటు క్రెడిట్ హిస్టరీకి కూడా ప్రాధాన్యం ఉంటుంది. గతంలో తీసుకున్న రుణాలు లేదా క్రెడిట్ కార్డు బిల్లులను సకాలంలో చెల్లించారా? ఇప్పటికే ఉన్న రుణాల భారం ఎంత ఉంది? అందుబాటులో ఉన్న క్రెడిట్ పరిమితిలో ఎంత మేరకు వినియోగిస్తున్నారు? వంటి అంశాలను కూడా బ్యాంకులు పరిశీలించవచ్చు. అందువల్ల జీతం స్లిప్ లేకపోవడం ఒక్కటే కారణంగా క్రెడిట్ కార్డు లభించదని భావించాల్సిన అవసరం లేదు. సరైన ఆదాయ ఆధారాలు, మెరుగైన బ్యాంకింగ్ చరిత్ర, మంచి క్రెడిట్ ప్రొఫైల్ ఉంటే అర్హత సాధించే అవకాశం ఉంటుంది. అయితే తుది ఆమోదం మాత్రం సంబంధిత బ్యాంకు నిబంధనలు, దరఖాస్తుదారుడి ఆర్థిక పరిస్థితిపై ఆధారపడి ఉంటుంది.