తూటాలకు తూటాలే సమాధానం.. టైగర్ ష్రాఫ్ ఘటనపై ఏక్‌నాథ్ షిండే హెచ్చరిక

బాలీవుడ్ నటుడు టైగర్ ష్రాఫ్‌పై జరిగిన కాల్పుల ఘటన ముంబైలో భద్రతపై మరోసారి చర్చకు దారితీసింది. ఈ నేపథ్యంలో మహారాష్ట్ర ఉప ముఖ్యమంత్రి ఏక్‌నాథ్ షిండే నటుడిని పరామర్శించి, ఆయన కుటుంబానికి పూర్తి భద్రత కల్పిస్తామని హామీ ఇచ్చారు. గ్యాంగ్‌వార్‌లను, సెలబ్రిటీలకు క్రిమినల్ గ్యాంగులు చేసే బెదిరింపులను సహించబోమని స్పష్టం చేశారు. ముంబైలోని జుహూ ప్రాంతంలో ఆదివారం సాయంత్రం గుర్తుతెలియని వ్యక్తులు టైగర్ ష్రాఫ్ ఉన్న కారుపై కాల్పులు జరిపినట్లు సమాచారం. ఈ ఘటనలో నటుడికి స్వల్ప గాయాలయ్యాయి. దాడికి తామే బాధ్యులమంటూ లారెన్స్ బిష్ణోయ్ గ్యాంగ్ పేరుతో ఓ పోస్టు వైరల్ కావడంతో ఈ ఘటనపై మరింత చర్చ మొదలైంది. అయితే, ఆ పోస్టు నిజానిజాలను దర్యాప్తులో నిర్ధారించాల్సి ఉంది. నటుడిని పరామర్శించిన అనంతరం మీడియాతో మాట్లాడిన ఏక్‌నాథ్ షిండే.. నిందితులకు కఠిన హెచ్చరికలు జారీ చేశారు. నేరగాళ్లకు తూటాలతోనే సమాధానం చెబుతామని వ్యాఖ్యానించారు. ముంబైలో గ్యాంగ్‌వార్‌లకు తావులేదని, క్రిమినల్ గ్యాంగుల మూలాలను పూర్తిగా నిర్మూలించాల్సిన అవసరం ఉందని పేర్కొన్నారు. సెలబ్రిటీలను లక్ష్యంగా చేసుకుని బెదిరింపులకు పాల్పడే వారిపై కఠిన చర్యలు తీసుకుంటామని షిండే స్పష్టం చేశారు. ఈ ఘటనపై పోలీసులు లోతైన దర్యాప్తు చేపట్టినట్లు తెలిపారు.