Eluru: పోలీస్ స్పోర్ట్స్ మీట్‌లో ఏలూరు రేంజ్ సత్తా.. 308 పతకాలు

ఏలూరు: మంగళగిరిలో నిర్వహించిన ఏపీ పోలీస్ స్పోర్ట్స్ మీట్–2026లో ఏలూరు రేంజ్ పోలీస్ క్రీడాకారులు విశేష ప్రతిభ కనబరిచారు. వివిధ క్రీడాంశాల్లో పోటీపడి మొత్తం 308 పతకాలు సాధించి సత్తా చాటారు. ఇందులో 119 బంగారు, 116 వెండి, 73 కాంస్య పతకాలు ఉన్నట్లు పోలీసు అధికారులు తెలిపారు. ఆంధ్రప్రదేశ్ పోలీస్ శాఖ ఆధ్వర్యంలో మంగళగిరిలోని VIT యూనివర్సిటీలో ఈ నెల 1 నుంచి 4వ తేదీ వరకు పోలీస్ స్పోర్ట్స్ మీట్–2026 నిర్వహించారు. ఈ పోటీల్లో ఏలూరు రేంజ్‌కు చెందిన పోలీస్ క్రీడాకారులు పాల్గొని పలు విభాగాల్లో మెరుగైన ప్రదర్శన ఇచ్చారు. పతక విజేతలను అభినందించేందుకు ఏలూరు అమీనా పేటలోని పోలీస్ కళ్యాణ మండపంలో ప్రత్యేక కార్యక్రమం నిర్వహించారు. ఈ కార్యక్రమంలో రేంజ్ ఐజీ జి.వి.జి. అశోక్ కుమార్, ఏలూరు జిల్లా ఎస్పీ కె. ప్రతాప్ శివ కిషోర్, అదనపు ఎస్పీ (అడ్మిన్) వై. ప్రసాదరావు పాల్గొన్నారు. విజేతలను అధికారులు అభినందించి, వారి ప్రతిభను ప్రశంసించారు. పోలీస్ విధుల్లో నైపుణ్యంతో పాటు క్రీడల్లోనూ ప్రతిభ కనబరచడం సిబ్బందికి అనేక విధాలుగా ఉపయోగపడుతుందని అధికారులు పేర్కొన్నారు. క్రీడలు శారీరక దృఢత్వంతో పాటు మానసిక ఉల్లాసం, క్రమశిక్షణ, ఏకాగ్రత, సమయస్ఫూర్తి, జట్టు స్ఫూర్తిని పెంపొందిస్తాయని తెలిపారు. పోలీస్ విధుల్లో సేవలందిస్తూనే క్రీడా రంగంలోనూ అత్యుత్తమ ప్రతిభ చూపి ఏలూరు రేంజ్‌కు గుర్తింపు తీసుకువచ్చిన క్రీడాకారులను అధికారులు ప్రత్యేకంగా అభినందించారు.