హనుమకొండలో నకిలీ తాకట్టు పత్రాలతో రూ.59.30 లక్షల మోసం.. ఇద్దరి అరెస్ట్

హనుమకొండ: నకిలీ బంగారం తాకట్టు పత్రాన్ని సృష్టించి, గోల్డ్ ఫైనాన్స్ సంస్థను నమ్మించి రూ.59.30 లక్షలు మోసం చేసిన కేసులో ఇద్దరిని హనుమకొండ పోలీసులు అరెస్ట్ చేశారు. పోలీసుల వివరాల ప్రకారం.. ఎలిమి సంతోష్ (37), శ్రిమాన్ కో-ఆపరేటివ్ క్రెడిట్ యూనియన్ చైర్మన్, సీఈఓగా ఉన్న వ్యక్తి, వడ్డేపల్లి రంజిత్ (39), వ్యాపారిని ఈ కేసులో నిందితులుగా గుర్తించారు. పోలీసుల దర్యాప్తు ప్రకారం.. రంజిత్‌కు చెందిన సుమారు 640 గ్రాముల బంగారం శ్రిమాన్ కో-ఆపరేటివ్ క్రెడిట్ యూనియన్‌లో తాకట్టు పెట్టినట్లు చూపిస్తూ నకిలీ ప్లెడ్జ్ రసీదును ఇద్దరూ కలిసి తయారు చేసినట్లు వెల్లడైంది. వాస్తవంగా బంగారం తాకట్టు లేకపోయినా, పత్రాల ఆధారంగా తాకట్టు ఉన్నట్లు నమ్మించే ప్రయత్నం చేసినట్లు పోలీసులు తెలిపారు. ఈ నకిలీ పత్రాన్ని నిజమైనదిగా నమ్మిన గోల్డ్ ఫైనాన్స్ కంపెనీ ప్రతినిధులు బంగారాన్ని ప్రత్యక్షంగా పరిశీలించకుండానే, తమ బ్యాంకు ఖాతా నుంచి ఆర్‌టీజీఎస్ ద్వారా రూ.59,30,000ను శ్రిమాన్ కో-ఆపరేటివ్ క్రెడిట్ యూనియన్ ఖాతాకు బదిలీ చేసినట్లు పోలీసులు పేర్కొన్నారు. తర్వాత ఈ వ్యవహారంపై అనుమానాలు వ్యక్తం చేసిన గోల్డ్ ఫైనాన్స్ సంస్థ ప్రతినిధులు పోలీసులకు ఫిర్యాదు చేస్తామని హెచ్చరించినట్లు దర్యాప్తులో తేలిందని పోలీసులు తెలిపారు. ఈ క్రమంలో ఖాతాలో జమ అయిన నగదును ఇతర అవసరాలకు మళ్లించినట్లు విచారణలో వెల్లడైనట్లు చెప్పారు. కేసు దర్యాప్తులో భాగంగా నిందితుల మొబైల్ ఫోన్లు, నకిలీ ప్లెడ్జ్ పత్రం కాపీని పోలీసులు స్వాధీనం చేసుకున్నారు. అనంతరం ఇద్దరినీ అరెస్ట్ చేసి తదుపరి దర్యాప్తు కొనసాగిస్తున్నారు. ఈ వ్యవహారంలో మరెవరైనా ప్రమేయం ఉందా? ఇదే తరహాలో ఇతర గోల్డ్ ఫైనాన్స్ సంస్థలను కూడా మోసం చేశారా? అనే కోణాల్లో పోలీసులు విచారణ చేస్తున్నారు. దర్యాప్తు పూర్తయిన తర్వాత కేసులో మరిన్ని వివరాలు వెలుగులోకి వచ్చే అవకాశం ఉంది.