హైదరాబాద్‌లో భారీ అగ్నిప్రమాదం.. బాంబే హోజరీ దుకాణం, గోదాములో మంటలు

హైదరాబాద్‌లో భారీ అగ్నిప్రమాదం చోటుచేసుకుంది. తెలంగాణ హైకోర్టుకు ఎదురుగా, మదీనా క్రాస్‌ రోడ్‌ వద్ద ఉన్న బాంబే హోజరీ వస్త్ర దుకాణం, గోదాములో సోమవారం తెల్లవారుజామున మంటలు చెలరేగాయి. ఈ ఘటనతో స్థానికంగా కలకలం రేగింది. అగ్నిప్రమాదంపై సమాచారం అందుకున్న అగ్నిమాపక సిబ్బంది, చార్మినార్‌ పోలీసులు వెంటనే ఘటనా స్థలానికి చేరుకున్నారు. మంటలను అదుపులోకి తెచ్చేందుకు సహాయక చర్యలు చేపట్టారు. దుకాణం, గోదాములో అగ్నిప్రమాదం సంభవించడంతో ఘటనకు సంబంధించిన వివరాలపై అధికారులు ఆరా తీస్తున్నారు. మరోవైపు, ఈ ప్రమాదానికి గల కారణాలు ఇంకా తెలియరాలేదు. ఘటనపై పోలీసులు కేసు నమోదు చేసి దర్యాప్తు చేస్తున్నారు. అగ్నిప్రమాదంలో జరిగిన ఆస్తి నష్టానికి సంబంధించిన పూర్తి వివరాలు తెలియాల్సి ఉంది.