పాక్‌పై భారత్‌ 19-0 ఘన విజయం.. సెమీస్‌కు జూనియర్‌ మహిళలు

మోకి (చైనా): జూనియర్‌ ఆసియా కప్‌ హాకీలో భారత జూనియర్‌ మహిళల జట్టు అదరగొట్టింది. చిరకాల ప్రత్యర్థి పాకిస్థాన్‌పై పూర్తి ఆధిపత్యం ప్రదర్శించిన భారత్‌.. క్వార్టర్‌ఫైనల్లో ఏకంగా 19-0తో ఘన విజయం సాధించి సెమీఫైనల్‌కు చేరుకుంది. మ్యాచ్‌ ఆరంభం నుంచే భారత ఆటగాళ్లు దూకుడుగా ఆడారు. ప్రత్యర్థి గోల్‌పోస్ట్‌పై వరుస దాడులు చేస్తూ పాకిస్థాన్‌ను ఒత్తిడిలోకి నెట్టారు. తొలి క్వార్టర్‌లోనే ఐదు గోల్స్‌ చేసిన భారత్‌.. మ్యాచ్‌పై పట్టు సాధించింది. రెండో క్వార్టర్‌లో మరో ఐదు గోల్స్‌ చేసి ఆధిక్యాన్ని మరింత పెంచుకుంది. మూడో క్వార్టర్‌లో మూడు, చివరి క్వార్టర్‌లో ఆరు గోల్స్‌ చేయడంతో భారత విజయం 19-0గా నమోదైంది. భారత్‌ తరఫున పూజా మాలిక్‌ హ్యాట్రిక్‌తో మెరిసింది. 27వ, 49వ, 51వ నిమిషాల్లో గోల్స్‌ చేసి జట్టు భారీ విజయంలో కీలక పాత్ర పోషించింది. రోషిణి, సనిక, సుప్రియ, మధు సిదర్‌ చెరో రెండు గోల్స్‌ సాధించారు. మ్యాచ్‌లో భారత దాడుల తీవ్రతకు పెనాల్టీ కార్నర్ల గణాంకం కూడా అద్దం పడుతోంది. భారత్‌కు ఏకంగా 18 పెనాల్టీ కార్నర్లు, ఒక పెనాల్టీ స్ట్రోక్‌ లభించాయి. మరోవైపు పాకిస్థాన్‌కు ఒక్క పెనాల్టీ కార్నర్‌ కూడా దక్కలేదు. దీంతో మ్యాచ్‌ మొత్తం భారత్‌ ఎంతటి ఆధిపత్యాన్ని ప్రదర్శించిందో స్పష్టమవుతోంది. పురుషుల సెమీస్‌లో మలేసియాతో భారత్‌ జూనియర్‌ ఆసియా కప్‌ పురుషుల విభాగంలో డిఫెండింగ్‌ చాంపియన్‌ భారత్‌ కూడా సెమీఫైనల్‌ పోరుకు సిద్ధమైంది. శుక్రవారం మధ్యాహ్నం 2.15 గంటలకు మలేసియాతో భారత జట్టు తలపడనుంది. టైటిల్‌ను నిలబెట్టుకోవాలన్న లక్ష్యంతో భారత్‌ ఈ కీలక పోరులో బరిలోకి దిగనుంది.