భారత్-పాక్ ఫైనల్‌కు వర్షం ముప్పు.. మ్యాచ్ రద్దయితే గోల్డ్ ఎవరికంటే?

ఆసియా క్రీడలు-2026 పురుషుల క్రికెట్‌లో ఎంతో ఆసక్తి రేపుతున్న భారత్‌-పాకిస్థాన్‌ ఫైనల్‌కు వాతావరణం రూపంలో మరో సవాలు ఎదురవుతోంది. శనివారం జపాన్‌లోని నిస్సిన్‌లో ఉన్న కొరోగి స్పోర్ట్స్ పార్క్‌లో ఇరు జట్లు స్వర్ణ పతకం కోసం తలపడనున్నాయి. భారత్‌ శ్రీలంకపై, పాకిస్థాన్‌ బంగ్లాదేశ్‌పై సెమీఫైనల్‌లో విజయం సాధించి ఫైనల్‌కు చేరాయి. అయితే ఈ మ్యాచ్‌కు వర్షం అంతరాయం కలిగించే అవకాశం ఉండటంతో అభిమానుల్లో ఉత్కంఠ నెలకొంది. ఈ ఆసియా క్రీడల్లో ఇప్పటికే వర్షం కారణంగా పురుషుల క్రికెట్‌ క్వార్టర్‌ ఫైనల్‌ మ్యాచ్‌లు రద్దయ్యాయి. భారత్‌-అఫ్గానిస్థాన్‌, పాకిస్థాన్‌-హాంకాంగ్‌ మ్యాచ్‌లు కూడా వర్షం కారణంగా జరగకుండానే ముగిశాయి. మ్యాచ్‌ పూర్తిగా రద్దయితే గోల్డ్ ఎవరికంటే? ఇక్కడే ఈసారి ఆసియా క్రీడల నిబంధనల్లో కీలకమైన మార్పు కనిపిస్తోంది. 2023 హాంగ్‌జౌ ఆసియా క్రీడల్లో భారత్‌-అఫ్గానిస్థాన్‌ పురుషుల క్రికెట్‌ ఫైనల్‌ వర్షం కారణంగా ఒక్క బంతి కూడా పడకుండానే రద్దైంది. అప్పట్లో టీ20 ర్యాంకింగ్స్‌ ఆధారంగా భారత్‌కు స్వర్ణ పతకం దక్కింది. అయితే 2026 ఆసియా క్రీడల్లో ఫైనల్‌కు రిజర్వ్‌ డే లేదు. మ్యాచ్‌ పూర్తిగా రద్దయి ఎలాంటి ఫలితం నమోదు కాకపోతే.. భారత్‌, పాకిస్థాన్‌ రెండింటినీ సంయుక్త విజేతలుగా ప్రకటించి ఇరు జట్లకు స్వర్ణ పతకాలు అందజేయనున్నారు. ఈ విషయాన్ని టోర్నమెంట్‌ నిర్వాహకులు ధృవీకరించినట్లు నివేదికలు పేర్కొంటున్నాయి. అంటే, వర్షం కారణంగా ఫైనల్‌ పూర్తిగా రద్దయితే గత ఆసియా క్రీడల్లో మాదిరిగా ర్యాంకింగ్‌ ఆధారంగా ఒక్క జట్టును విజేతగా ప్రకటించే విధానం ఈసారి వర్తించదు. భారత్‌, పాకిస్థాన్‌ సంయుక్తంగా గోల్డ్‌ మెడల్‌ సాధించినట్లవుతుంది. మ్యాచ్‌ జరిగితే మాత్రం.. వర్షం ఉన్నప్పటికీ మ్యాచ్‌కు అవసరమైన కనీస ఓవర్ల ఆట సాధ్యమైతే.. నిబంధనల ప్రకారం ఫలితాన్ని నిర్ణయించే అవకాశం ఉంటుంది. మ్యాచ్‌ టై అయితే సూపర్‌ ఓవర్‌ ద్వారా విజేతను నిర్ణయించే విధానం ఉంటుంది. అయితే వర్షం తీవ్రత కారణంగా మ్యాచ్‌ పూర్తిగా నిర్వహించలేని పరిస్థితి వస్తే సంయుక్త స్వర్ణం నిబంధన అమల్లోకి వస్తుంది. ఆసియా క్రీడల్లో తొలిసారి భారత్‌-పాక్‌ ఫైనల్‌ ఆసియా క్రీడల పురుషుల క్రికెట్‌ చరిత్రలో భారత్‌, పాకిస్థాన్‌ జట్లు తొలిసారి ఫైనల్‌లో తలపడుతున్నాయి. భారత్‌ 2023 హాంగ్‌జౌ ఆసియా క్రీడల్లో స్వర్ణ పతకం సాధించింది. ఈసారి ఆ టైటిల్‌ను నిలబెట్టుకోవాలనే లక్ష్యంతో బరిలోకి దిగుతోంది. మరోవైపు పాకిస్థాన్‌ తొలిసారి ఆసియా క్రీడల పురుషుల క్రికెట్‌లో స్వర్ణం సాధించే అవకాశం కోసం పోటీపడుతోంది. భారత్‌-పాక్‌ ఫైనల్‌ అక్టోబర్‌ 3న కొరోగి స్పోర్ట్స్ పార్క్‌లో జరగనుంది. కాబట్టి మ్యాచ్‌ ఫలితాన్ని నిర్ణయించడంలో ఇరు జట్ల ప్రదర్శనతో పాటు వాతావరణ పరిస్థితులు కూడా కీలకంగా మారనున్నాయి.