2035 నాటికి భారత అంతరిక్ష కేంద్రం.. 2040లో చంద్రుడిపైకి భారతీయుడు: మోదీ

న్యూఢిల్లీ, సెప్టెంబరు 10: భారత అంతరిక్ష రంగంలో మరో కీలక లక్ష్యాన్ని ప్రధానమంత్రి నరేంద్ర మోదీ ప్రకటించారు. 2035 నాటికి భారత అంతరిక్ష కేంద్రాన్ని ఏర్పాటు చేయడమే లక్ష్యంగా పెట్టుకున్నట్లు వెల్లడించారు. అదే సమయంలో 2040 నాటికి చంద్రుడిపైకి భారతీయుడిని పంపే దిశగా దేశం ముందుకు సాగుతోందని తెలిపారు. పారిస్‌లో గురువారం జరిగిన తొలి అంతర్జాతీయ అంతరిక్ష సదస్సులో వీడియో కాన్ఫరెన్స్‌ ద్వారా ప్రధాని మోదీ ప్రసంగించారు. అంతరిక్ష రంగంలో భారత్‌ సాధిస్తున్న పురోగతిని వివరించడంతో పాటు, భవిష్యత్‌ అంతరిక్ష పరిశోధనల్లో ప్రపంచ దేశాలతో కలిసి పనిచేయడానికి భారత్‌ సిద్ధంగా ఉందని ఆయన స్పష్టం చేశారు. చంద్రయాన్‌-3 నుంచి ఆదిత్య ఎల్‌1 వరకు భారత్‌ చేపట్టిన కీలక అంతరిక్ష ప్రయోగాలను ప్రధాని ప్రస్తావించారు. చంద్రయాన్‌-3 విజయంతో చంద్రుడి దక్షిణ ధ్రువ ప్రాంతంలో విజయవంతంగా దిగిన దేశంగా భారత్‌ నిలిచిందని పేర్కొన్నారు. అలాగే ఆదిత్య ఎల్‌1 మిషన్‌ ద్వారా సూర్యుడిపై పరిశోధనలకు భారత్‌ కొత్త దిశను తెరిచిందని తెలిపారు. ఇటీవల ఒక భారతీయుడు అంతరిక్ష కేంద్రానికి వెళ్లి తిరిగి వచ్చిన విషయాన్ని కూడా ప్రధాని గుర్తుచేశారు. మానవ అంతరిక్ష ప్రయాణంలో భారత్‌ తన సామర్థ్యాలను క్రమంగా విస్తరిస్తోందని ఈ సందర్భంగా వివరించారు. 2040లో చంద్రుడిపై భారతీయుడు భారత్‌ అంతరిక్ష కార్యక్రమంలో తదుపరి ప్రధాన లక్ష్యాల్లో చంద్రుడిపై మానవుడిని పంపడం ఒకటని మోదీ తెలిపారు. 2040 నాటికి చంద్రుడిపైకి భారతీయుడిని పంపాలనే లక్ష్యంతో ముందుకు సాగుతున్నట్లు వెల్లడించారు. అంతరిక్ష పరిశోధనల ద్వారా లభించే సాంకేతిక పరిజ్ఞానం, శాస్త్రీయ ప్రయోజనాలు కేవలం ఒక దేశానికే పరిమితం కాకుండా మానవాళికి ఉపయోగపడాలన్నదే భారత్‌ లక్ష్యమని ఆయన పేర్కొన్నారు. ఇస్రోతో పాటు ప్రైవేట్‌ రంగానికీ ప్రాధాన్యం దేశంలో అంతరిక్ష రంగం ఇక ప్రభుత్వ సంస్థలకు మాత్రమే పరిమితం కాకుండా ప్రైవేట్‌ రంగం కూడా వేగంగా విస్తరిస్తోందని ప్రధాని తెలిపారు. ఇస్రోతో పాటు ప్రైవేట్‌ అంతరిక్ష సంస్థలు కూడా అభివృద్ధి చెందుతున్నాయని చెప్పారు. ఇది అంతరిక్ష పరిశోధన, ఉపగ్రహ సాంకేతికత, ప్రయోగ వాహనాల అభివృద్ధి వంటి రంగాల్లో భారత్‌ సామర్థ్యాలను మరింత పెంచే అవకాశం కల్పిస్తుందని ప్రభుత్వం భావిస్తోంది. ఫ్రాన్స్‌తో దీర్ఘకాలిక భాగస్వామ్యం భారత్‌ అంతరిక్ష కార్యక్రమానికి ఫ్రాన్స్‌ చాలా కాలంగా విశ్వసనీయ భాగస్వామిగా ఉందని మోదీ పేర్కొన్నారు. 1960లో భారత అంతరిక్ష కార్యక్రమాలు ప్రారంభమైనప్పటి నుంచి ఇరు దేశాల మధ్య సహకారం కొనసాగుతోందని గుర్తుచేశారు. ఆధునిక సాంకేతిక పరిజ్ఞానం నుంచి శాస్త్రీయ నైపుణ్యాన్ని మానవ అవసరాలకు వినియోగించే వరకు భారత్‌, ఫ్రాన్స్‌ మధ్య సహకారం విస్తరిస్తోందని తెలిపారు. భవిష్యత్‌ అంతరిక్ష పరిశోధనల్లో భారత్‌తో కలిసి పనిచేయాలని ప్రపంచ దేశాలకు ప్రధాని మోదీ పిలుపునిచ్చారు. దీంతో అంతరిక్ష రంగంలో భారత్‌ తన సాంకేతిక సామర్థ్యాలను పెంచుకోవడంతో పాటు అంతర్జాతీయ భాగస్వామ్యాలను మరింత విస్తరించే దిశగా అడుగులు వేస్తున్నట్లు స్పష్టమవుతోంది.