‘రోడ్లు డ్రైవింగ్ కోసమే కదా?’.. ముగ్గురి మృతిపై నిందితుడి వ్యాఖ్యలు!

కేరళలోని కొచ్చి అంతర్జాతీయ విమానాశ్రయం సమీపంలో జరిగిన ఘోర రోడ్డు ప్రమాదం తీవ్ర కలకలం రేపుతోంది. అతి వేగంగా దూసుకొచ్చిన మినీ కూపర్ కారు స్కూటర్‌ను వెనుక నుంచి బలంగా ఢీకొట్టడంతో ముగ్గురు ప్రాణాలు కోల్పోయారు. ప్రమాదం తర్వాత నిందితుడు చేసినట్లు ప్రచారంలో ఉన్న వ్యాఖ్యలు మరింత ఆగ్రహానికి కారణమయ్యాయి. ఎర్నాకుళం జిల్లా నెడుంబస్సేరిలో ఆదివారం తెల్లవారుజామున ఈ ప్రమాదం జరిగింది. పోలీసుల వివరాల ప్రకారం.. దేవిక (వయనాడ్), గోపిక (పాలక్కాడ్), ఇజాజ్ (కర్ణాటక) అనే ముగ్గురు స్నేహితులు సమీపంలోని దుకాణంలో టీ తాగి స్కూటర్‌పై ఇంటికి తిరిగి వెళ్తున్నారు. తెల్లవారుజామున సుమారు 2 గంటల సమయంలో వేగంగా వచ్చిన మినీ కూపర్ కారు వారి స్కూటర్‌ను ఢీకొట్టింది. తీవ్రంగా గాయపడిన ముగ్గురిని స్థానికులు ఆస్పత్రికి తరలించినప్పటికీ ప్రాణాలు దక్కలేదు. నిందితుడిపై మత్తు పదార్థాల కోణంలో దర్యాప్తు ప్రమాదానికి కారణమైన కారును 19 ఏళ్ల సుహైల్ సజీవ్ నడుపుతున్నట్లు పోలీసులు గుర్తించారు. ప్రమాదం జరిగిన అనంతరం స్థానికులు అతడిని పట్టుకుని పోలీసులకు అప్పగించారు. డ్రైవర్ మద్యం లేదా ఇతర మత్తు పదార్థాలు తీసుకున్నాడా అనే కోణంలో దర్యాప్తు కొనసాగుతోంది. ఎర్నాకుళం రూరల్ ఎస్పీ కేఎస్ సుదర్శన్ తెలిపిన వివరాల ప్రకారం.. నిందితుడు మద్యం సేవించి ఉండవచ్చని ప్రాథమిక విచారణలో అనుమానాలు వ్యక్తమయ్యాయి. అయితే రక్త నమూనాల పరీక్షలకు సంబంధించిన తుది నివేదికలు రావాల్సి ఉంది. కారులో మత్తు పదార్థాలకు సంబంధించిన ఆనవాళ్లు ఉన్నాయా అనే విషయాన్ని ఫోరెన్సిక్ బృందం పరిశీలిస్తోంది. ‘రోడ్లు డ్రైవింగ్ కోసమే కదా?’.. వ్యాఖ్యలపై ఆగ్రహం ఈ ఘటనలో ముగ్గురు ప్రాణాలు కోల్పోయిన నేపథ్యంలో.. విచారణ సమయంలో నిందితుడు ఏమాత్రం పశ్చాత్తాపం వ్యక్తం చేయలేదని పోలీసులు పేర్కొన్నట్లు సమాచారం. పైగా, ‘రోడ్లు దేనికి? డ్రైవింగ్ కోసమే కదా?’ అని ప్రశ్నించినట్లు కథనాలు వెలువడ్డాయి. ఈ విషయాన్ని తన తండ్రి చూసుకుంటారని చెప్పినట్లు కూడా సమాచారం. మరోవైపు, వైద్య పరీక్షల కోసం నిందితుడిని ఆస్పత్రికి తీసుకెళ్లిన సమయంలో మృతుల స్నేహితుల్లో కొందరు అతడిపై దాడికి దిగారు. దీంతో పరిస్థితిని అదుపులోకి తీసుకురావడానికి పోలీసులు ఒకరిని అదుపులోకి తీసుకున్నారు. ఒక క్షణం నిర్లక్ష్యం, అతివేగం మూడు కుటుంబాల్లో తీరని విషాదాన్ని నింపాయి. ప్రమాదానికి అసలు కారణం ఏమిటి? డ్రైవర్ మత్తులో ఉన్నాడా? అనే ప్రశ్నలకు పరీక్షల నివేదికలు, పోలీసుల దర్యాప్తు పూర్తయిన తర్వాతే స్పష్టత రానుంది.