కుత్బుల్లాపూర్ కిమ్స్ ఆసుపత్రి వద్ద ఉద్రిక్తత.. భారీ బిల్లుపై కుటుంబ సభ్యుల ఆందోళన!

కుత్బుల్లాపూర్‌లోని కొంపల్లి కిమ్స్ ఆసుపత్రి వద్ద యువకుడి మృతితో ఉద్రిక్త పరిస్థితులు నెలకొన్నాయి. చికిత్స కోసం ఆసుపత్రిలో చేరిన ఆరు గంటల్లోనే రూ.6 లక్షల బిల్లు వేశారంటూ మృతుడి కుటుంబ సభ్యులు, స్నేహితులు ఆందోళనకు దిగారు. భారీ బిల్లుపై ప్రశ్నలు లేవనెత్తుతూ ఆసుపత్రి యాజమాన్యంపై చర్యలు తీసుకోవాలని డిమాండ్ చేశారు. వివరాల్లోకి వెళ్తే.. జీడిమెట్ల గ్రామానికి చెందిన నూర్ ఆలం (28)కు కామెర్ల సమస్య రావడంతో కుటుంబ సభ్యులు గురువారం సాయంత్రం 4 గంటల సమయంలో కొంపల్లి కిమ్స్ ఆసుపత్రిలో చేర్పించారు. అయితే, కొద్దిసేపటికే అతడి ఆరోగ్య పరిస్థితి విషమించిందని వైద్యులు తెలిపినట్లు కుటుంబ సభ్యులు పేర్కొన్నారు. చివరకు చికిత్స పొందుతూ నూర్ ఆలం మృతి చెందినట్లు ఆసుపత్రి వైద్యులు ప్రకటించారు. యువకుడి మృతితో విషాదంలో ఉన్న కుటుంబ సభ్యులకు రూ.6 లక్షల బిల్లు చెల్లించాలని ఆసుపత్రి వర్గాలు సూచించినట్లు సమాచారం. కేవలం ఆరు గంటల చికిత్సకే ఇంత భారీ మొత్తం ఎలా అవుతుందని కుటుంబ సభ్యులు, స్నేహితులు ప్రశ్నించారు. ఈ నేపథ్యంలో పెద్ద సంఖ్యలో ఆసుపత్రి వద్దకు చేరుకుని ఆందోళన చేపట్టారు. వైద్య సేవలకు భారీ మొత్తంలో బిల్లులు వసూలు చేస్తున్నారంటూ నిరసనకారులు ఆరోపించారు. ఆసుపత్రి బిల్లింగ్ విధానంపై విచారణ జరిపి, బాధ్యులపై చర్యలు తీసుకోవాలని డిమాండ్ చేశారు. అయితే, బిల్లుకు సంబంధించిన పూర్తి వివరాలు, ఆసుపత్రి యాజమాన్య వివరణ, ఘటనపై అధికారుల స్పందన తెలియాల్సి ఉంది.