కొవ్వూరు సమీపంలో పట్టాలు తప్పిన గూడ్స్ రైలు.. నిలిచిన పలు రైళ్ల రాకపోకలు

విశాఖపట్నం–విజయవాడ ప్రధాన రైల్వే మార్గంలో గూడ్స్ రైలు పట్టాలు తప్పడంతో రైళ్ల రాకపోకలకు తీవ్ర అంతరాయం ఏర్పడింది. తూర్పుగోదావరి జిల్లా కొవ్వూరు–పశివేదల మధ్య శుక్రవారం ఈ ఘటన చోటుచేసుకుంది. ఫెర్టిలైజర్స్ లోడుతో ఒడిశా నుంచి మహారాష్ట్రకు వెళ్తున్న గూడ్స్ రైలులోని ఎనిమిది బోగీలు పట్టాలు తప్పినట్లు అధికారులు తెలిపారు. ఘటనపై సమాచారం అందిన వెంటనే రైల్వే శాఖ అధికారులు, సిబ్బంది అక్కడికి చేరుకుని పరిస్థితిని సమీక్షించారు. పట్టాలు తప్పిన బోగీలను ట్రాక్‌పై నుంచి తొలగించి.. రైల్వే మార్గాన్ని వీలైనంత త్వరగా పునరుద్ధరించేందుకు యుద్ధ ప్రాతిపదికన చర్యలు చేపట్టారు. గూడ్స్ రైలు ప్రమాదం ప్రభావం ప్రధాన రైల్వే మార్గంపై స్పష్టంగా కనిపించింది. విశాఖపట్నం–విజయవాడ మధ్య నడిచే పలు ఎక్స్‌ప్రెస్ రైళ్లను మార్గమధ్యంలోనే నిలిపివేయాల్సి వచ్చింది. సామర్లకోటలో విశాఖపట్నం నుంచి వస్తున్న వందేభారత్ ఎక్స్‌ప్రెస్‌ను నిలిపివేయగా.. హౌరా నుంచి తిరుపతి వెళ్తున్న ఎక్స్‌ప్రెస్ రైలును కూడా అక్కడే నిలిపివేశారు. రైల్వే ట్రాక్‌పై ఏర్పడిన అంతరాయం కారణంగా విశాఖ–విజయవాడ మార్గంలో పలు రైళ్లు గంటల తరబడి ఆలస్యంగా నడుస్తున్నాయి. కొన్ని రైళ్లు దాదాపు ఎనిమిది గంటల ఆలస్యంతో నడుస్తున్నట్లు సమాచారం. దీంతో రైల్వే స్టేషన్లలో ప్రయాణికులు తీవ్ర ఇబ్బందులు ఎదుర్కొంటున్నారు. మరోవైపు వరుస సెలవులు రావడంతో ఇప్పటికే రైల్వే స్టేషన్లలో ప్రయాణికుల రద్దీ భారీగా ఉంది. రెండో శనివారం, ఆదివారం, సోమవారం వినాయకచవితి సెలవులు వరుసగా రావడంతో శుక్రవారం నుంచే పెద్ద సంఖ్యలో ప్రజలు సొంతూళ్లకు బయలుదేరారు. ఈ సమయంలోనే ప్రధాన రైల్వే మార్గంలో గూడ్స్ రైలు పట్టాలు తప్పడంతో ప్రయాణికుల ఇబ్బందులు మరింత పెరిగాయి. ప్రస్తుతం రైల్వే అధికారులు ట్రాక్ పునరుద్ధరణ పనులపై దృష్టి సారించారు. మార్గం పూర్తిగా అందుబాటులోకి వచ్చిన తర్వాతే రైళ్ల రాకపోకలు సాధారణ స్థితికి చేరుకునే అవకాశం ఉంది. ప్రమాదానికి దారితీసిన కారణాలపై కూడా రైల్వే అధికారులు పరిశీలన చేపట్టాల్సి ఉంది.