నయనతార ఇంట్లో పీవీ సింధు సందడి.. ఫొటోలు వైరల్!

భారత బ్యాడ్మింటన్ స్టార్, డబుల్ ఒలింపిక్ పతక విజేత పీవీ సింధు ప్రముఖ నటి నయనతార ఇంట్లో సందడి చేశారు. నయనతార, ఆమె భర్త విఘ్నేశ్ శివన్.. సింధు దంపతులను తమ ఇంటికి ఆహ్వానించి ఆత్మీయంగా విందు ఇచ్చారు. ఈ సందర్భంగా తీసుకున్న ఫొటోలు ప్రస్తుతం సోషల్ మీడియాలో వైరల్‌గా మారాయి. ఈ విషయాన్ని పీవీ సింధు స్వయంగా సోషల్ మీడియా ద్వారా వెల్లడించారు. నయనతార, విఘ్నేశ్ శివన్ ఇచ్చిన ఆతిథ్యానికి కృతజ్ఞతలు తెలుపుతూ ఆమె భావోద్వేగపూరితమైన పోస్టు పెట్టారు. సింధు తన పోస్టులో ఈ భేటీని ఎంతో ఆత్మీయంగా అభివర్ణించారు. అందమైన సాయంత్రం, అద్భుతమైన భోజనం, మనస్ఫూర్తిగా సాగిన సంభాషణలు, అంతులేని నవ్వులతో ఆ సమయం ఎంతో ప్రత్యేకంగా గడిచిందని తెలిపారు. స్నేహితులుగా నయనతార, విఘ్నేశ్ శివన్ ఇంటికి వెళ్లామని, అయితే అక్కడ జీవితానికి సంబంధించిన ఎన్నో విషయాలపై మాట్లాడుకున్న తర్వాత చాలా ఏళ్లుగా ఒకరికొకరం పరిచయం ఉన్నట్లుగా అనిపించిందని సింధు పేర్కొన్నారు. చెన్నై తనకు సొంతింటిలా అనిపిస్తోందని, ఈ భేటీ తర్వాత అక్కడ తన కోసం ఎదురుచూసే కుటుంబం మరింత పెరిగిన భావన కలిగిందని చెప్పారు. తనపై నయనతార, విఘ్నేశ్ శివన్ చూపించిన ఆప్యాయతకు సింధు కృతజ్ఞతలు తెలిపారు. ఆమె పోస్టుకు నయనతార, విఘ్నేశ్ శివన్ కూడా స్పందిస్తూ.. సింధు దంపతులను ప్రశంసించారు. వారిద్దరూ చాలా స్వీట్ అంటూ కామెంట్ చేశారు. సింధు షేర్ చేసిన ఫొటోల్లో నయనతార, విఘ్నేశ్ శివన్‌తో కలిసి ఆమె, ఆమె భర్త కనిపించారు. ఈ ఫొటోలు సోషల్ మీడియాలో వైరల్‌గా మారడంతో అభిమానులు, నెటిజన్లు ఆసక్తిగా స్పందిస్తున్నారు.