ఒమన్ తీరంలో చమురు నౌకపై డ్రోన్ దాడి.. ఇద్దరు భారతీయ నావికులు గల్లంతు

ఒమన్ తీరానికి సమీపంలో చమురు రవాణా నౌకపై జరిగిన డ్రోన్ దాడి కలకలం రేపింది. ఈ ఘటనలో ఇద్దరు భారతీయ నావికులు గల్లంతవగా.. మరో తొమ్మిది మందిని అధికారులు సురక్షితంగా రక్షించారు. అక్టోబర్ 11న ఒమన్‌లోని సోహార్ నౌకాశ్రయానికి సమీపంలో నికరాగ్వా జెండాతో ప్రయాణిస్తున్న ఎంటీ పెట్రో డాల్ఫిన్ (MT Petro Dolphin) నౌకపై ఈ దాడి జరిగింది. ఘటన సమయంలో నౌకలో మొత్తం 11 మంది భారతీయ నావికులు ఉన్నారు. దాడి అనంతరం చేపట్టిన సహాయక చర్యల్లో తొమ్మిది మందిని రక్షించగా.. మరో ఇద్దరి ఆచూకీ తెలియరాలేదు. గల్లంతైన నావికుల కోసం స్థానిక తీర రక్షక దళం గాలింపు చర్యలు చేపట్టింది. ఈ విషయాన్ని కేంద్ర నౌకాశ్రయాలు, నౌకాయాన శాఖ మంత్రి సర్బానంద సోనోవాల్ వెల్లడించారు. గల్లంతైన వారి ఆచూకీ కోసం స్థానిక అధికారులతో నిరంతరం సంప్రదింపులు జరుపుతున్నట్లు తెలిపారు. మరోవైపు, మస్కట్‌లోని భారత రాయబార కార్యాలయం కూడా ఈ ఘటనపై స్పందించింది. పరిస్థితిని నిశితంగా పరిశీలిస్తున్నామని, సంబంధిత అధికారులతో సమన్వయం చేసుకుంటున్నామని వెల్లడించింది. ప్రస్తుతం గల్లంతైన ఇద్దరు భారతీయ నావికుల ఆచూకీపై ఉత్కంఠ కొనసాగుతోంది. వారి కోసం గాలింపు చర్యలు కొనసాగుతున్న నేపథ్యంలో తదుపరి వివరాలపై ఆసక్తి నెలకొంది.