పర్లాఖెముండిలో వయోవృద్ధుల తీర్థయాత్ర బస్సులు ప్రారంభం

పర్లాఖెముండి: గజపతి జిల్లా పర్లాఖెముండిలో వయోవృద్ధుల తీర్థయాత్రకు బస్సులు ప్రారంభమయ్యాయి. రాష్ట్ర ప్రభుత్వం అమలు చేస్తున్న తీర్థయాత్ర పథకంలో భాగంగా ఏర్పాటు చేసిన ఈ బస్సులను ఎమ్మెల్యే రూపేష్ పాణిగ్రహి గురువారం ప్రారంభించారు. ఈ కార్యక్రమం పర్లాఖెముండి పట్టణంలోని గజపతి క్రీడా మైదానం ప్రాంతంలో జరిగింది. ఈ విడతలో మొత్తం 72 మంది వయోవృద్ధులు అయోధ్య, వారణాసి పుణ్యక్షేత్రాలను సందర్శించనున్నారు. వారికి అవసరమైన ఏర్పాట్లను జిల్లా పర్యాటక శాఖ, సంబంధిత అధికారులు పర్యవేక్షించారు. ఈ సందర్భంగా ఎమ్మెల్యే రూపేష్ పాణిగ్రహి మాట్లాడుతూ.. వయోవృద్ధులకు తీర్థయాత్ర చేసే అవకాశం కల్పించడం సంతోషంగా ఉందన్నారు. అయోధ్య, వారణాసిలోని పుణ్యక్షేత్రాలను సందర్శించే సమయంలో వృద్ధులు జాగ్రత్తలు పాటించాలని సూచించారు. భవిష్యత్‌లో పూరి పుణ్యక్షేత్రానికి కూడా వయోవృద్ధులను ప్రత్యేకంగా తీసుకువెళ్లేందుకు చర్యలు తీసుకుంటానని తెలిపారు. జడ్పీ అధ్యక్షుడు గవర తిరుపతిరావు మాట్లాడుతూ.. కుటుంబ సభ్యులు వయోవృద్ధుల పట్ల తీసుకోవాల్సిన బాధ్యతను ప్రభుత్వం చేపట్టడం అభినందనీయమన్నారు. తీర్థయాత్రను సురక్షితంగా పూర్తి చేసుకుని తిరిగి రావాలని ఆకాంక్షించారు. కార్యక్రమంలో పురపాలక అధ్యక్షురాలు నిర్మల శెఠి, అదనపు కలెక్టర్ ఫాల్గుణ మాఝి, జిల్లా సామాజిక భద్రత శాఖ అధికారిణి ఉచ్చర్గీత బడరైత్, జిల్లా సాంస్కృతిక శాఖ అధికారిణి అర్చన కుమారి మంగరాజ్, జిల్లా శిశు సంరక్షణ అధికారి అరుణ్ కుమార్ త్రిపాఠి తదితరులు పాల్గొన్నారు. అనంతరం వయోవృద్ధులకు ఎమ్మెల్యే కిట్లను అందజేశారు. జిల్లా పర్యాటక అభివృద్ధి అధికారి సంగ్రామ్ తెలిపిన వివరాల ప్రకారం.. 72 మంది వయోవృద్ధులు బ్రహ్మపురం నుంచి శుక్రవారం ప్రత్యేక రైలులో అయోధ్య, వారణాసి తీర్థయాత్రకు బయలుదేరనున్నారు.