9 టు 5 ఉద్యోగం నచ్చలేదు.. ఆరుసార్లు కెరీర్ మార్చుకున్న రాజస్థాన్ యువతి కథ వైరల్!

జీవితంలో స్థిరపడాలంటే మంచి ఉద్యోగం, స్థిరమైన ఆదాయం, పెళ్లి, కుటుంబం.. ఇవే విజయానికి గుర్తులని చాలామంది భావిస్తారు. అయితే, అందరికీ ఒకే జీవనశైలి సరిపోతుందా? తమకు నచ్చిన విధంగా జీవించాలంటే సంప్రదాయ పద్ధతులనే అనుసరించాలా? ఇలాంటి ప్రశ్నలకు తన జీవిత ప్రయాణంతో సమాధానం చెబుతున్నారు రాజస్థాన్‌కు చెందిన 30 ఏళ్ల హిమానీ మిట్టల్. సాధారణంగా కనిపించే 9 టు 5 ఉద్యోగానికి పరిమితం కాకుండా, ఇప్పటివరకు ఆరుసార్లు కెరీర్ మార్చుకుంటూ తనకు నచ్చిన మార్గంలో ముందుకు సాగుతున్నారు. ఆమె ప్రయాణానికి సంబంధించిన వీడియో ప్రస్తుతం సోషల్ మీడియాలో చర్చనీయాంశంగా మారింది. 21 ఏళ్లకే సంపాదన మొదలు రాజస్థాన్‌లోని అబూ రోడ్‌కు చెందిన హిమానీ మిట్టల్ చిన్న వయసులోనే ఆర్థిక స్వాతంత్ర్యం ప్రాధాన్యాన్ని గుర్తించారు. ఈ క్రమంలో 21 ఏళ్ల వయసులో స్పానిష్ భాష బోధించడం ప్రారంభించారు. అప్పటికి ఆమె స్వయంగా ఆ భాషను నేర్చుకుంటున్నప్పటికీ, బోధనను ఆదాయ వనరుగా మార్చుకునే ప్రయత్నం చేశారు. కొత్త విషయాలు నేర్చుకుంటూనే సంపాదించాలన్న ఆలోచన ఆమె కెరీర్ ప్రయాణానికి పునాది వేసింది. కోవిడ్ సమయంలో ఆన్‌లైన్‌లోకి.. కరోనా మహమ్మారి సమయంలో హిమానీ తన పనిని ఆన్‌లైన్‌కు మార్చుకున్నారు. దీంతో ఇంటి నుంచే పని చేసుకునే అవకాశం లభించడంతో పాటు, కొత్త అవకాశాలను అన్వేషించేందుకు వెసులుబాటు కలిగింది. చిత్ర నిర్మాణంలో ఉన్నత విద్యను పూర్తి చేసిన అనంతరం, 25 ఏళ్ల వయసులో స్పెయిన్‌కు వెళ్లారు. అక్కడ ఇంగ్లిష్ బోధిస్తూ మూడేళ్లపాటు నివసించారు. ఈ సమయంలో యూరప్‌లోని పలు ప్రాంతాలను సందర్శించి, భిన్న సంస్కృతులు, జీవన విధానాలను దగ్గరగా తెలుసుకున్నారు. ఉద్యోగం కంటే నచ్చిన జీవనశైలికే ప్రాధాన్యం విదేశాల్లో గడిపిన అనుభవాల తర్వాత భారత్‌కు తిరిగి వచ్చిన హిమానీ, తనకు నచ్చిన జీవనశైలిని కొనసాగించాలని నిర్ణయించుకున్నారు. ఒకే ఉద్యోగంలో ఎక్కువకాలం కొనసాగడమే కెరీర్‌లో విజయానికి కొలమానం కాదని ఆమె ప్రయాణం సూచిస్తోంది. కొత్త అవకాశాలను స్వీకరించడం, తన ఆసక్తులకు అనుగుణంగా మార్పులు చేసుకోవడం ద్వారా కెరీర్‌ను కొత్త దిశల్లో తీసుకెళ్లవచ్చని ఆమె భావిస్తున్నారు. 30 ఏళ్ల వయసుపై ఒత్తిడికి తనదైన సమాధానం ప్రస్తుతం హిమానీ సోషల్ మీడియాలో ‘ఎస్‌ఎఫ్ ఛాలెంజ్’ పేరుతో ఓ కార్యక్రమాన్ని నిర్వహిస్తున్నారు. ముఖ్యంగా 30 ఏళ్ల వయసుకు చేరుకుంటున్నవారు, ఆ వయసులో ఉన్నవారు ఎదుర్కొనే సందేహాలు, సామాజిక ఒత్తిళ్లు, కెరీర్‌కు సంబంధించిన ప్రశ్నలపై ఇందులో చర్చిస్తున్నారు. ఉద్యోగం మార్చుకోవాలనుకునేవారికి, కొత్త అవకాశాల కోసం ప్రయత్నించేవారికి, జీవితంలో మరో అధ్యాయాన్ని ప్రారంభించాలనుకునేవారికి తన అనుభవాలు ఉపయోగపడతాయని ఆమె భావిస్తున్నారు. జీవితంలో విజయం సాధించడానికి, పెళ్లి చేసుకోవడానికి లేదా స్థిరపడటానికి ఒక నిర్దిష్ట వయసే ప్రామాణికం కాదన్నది హిమానీ చెప్పే ప్రధాన సందేశం. ఇతరుల జీవితాలతో పోల్చుకుంటూ ఒత్తిడికి గురికావడం కంటే, తమ ఆసక్తులు, లక్ష్యాలకు అనుగుణంగా నిర్ణయాలు తీసుకోవడం ముఖ్యమని ఆమె ప్రయాణం గుర్తుచేస్తోంది. హిమానీ తన అనుభవాలను వివరిస్తూ ఇన్‌స్టాగ్రామ్‌లో పంచుకున్న వీడియోకు పలువురు స్పందిస్తున్నారు.