రాజస్థాన్‌లో పాక్ డ్రోన్ ఆయుధాలు స్వాధీనం.. ఇద్దరి అరెస్ట్

భారత్‌–పాకిస్థాన్‌ సరిహద్దు సమీపంలో డ్రోన్‌ ద్వారా తరలించినట్లు అనుమానిస్తున్న ఆయుధాలు, పేలుడు పదార్థాలను రాజస్థాన్‌ భద్రతా బలగాలు స్వాధీనం చేసుకున్నాయి. శ్రీగంగానగర్‌ జిల్లా రావ్లా ప్రాంతంలోని ఓ వ్యవసాయ క్షేత్రంలో నిర్వహించిన తనిఖీల్లో సుమారు 7.75 కిలోల పేలుడు పదార్థాలు, రెండు పిస్టళ్లు, వందల సంఖ్యలో తూటాలు లభించినట్లు సమాచారం. ఈ ఘటనకు సంబంధించి పంజాబ్‌కు చెందిన ఇద్దరు యువకులను పోలీసులు అరెస్ట్ చేశారు. అధికారుల వివరాల ప్రకారం.. అక్టోబర్‌ 12 అర్ధరాత్రి సరిహద్దు అవతలి వైపు నుంచి డ్రోన్‌ ద్వారా అనుమానాస్పద ప్యాకెట్లు జారవిడిచినట్లు భద్రతా సంస్థలకు సమాచారం అందింది. దీంతో రాజస్థాన్‌ యాంటీ నార్కోటిక్స్‌ టాస్క్‌ఫోర్స్‌ (ANTF), సరిహద్దు భద్రతా దళం (BSF), స్థానిక పోలీసులు సంయుక్తంగా తనిఖీలు చేపట్టారు. తొలుత ఆ ప్యాకెట్లలో మాదకద్రవ్యాలు ఉండవచ్చని భావించినప్పటికీ, తనిఖీల్లో ఆయుధాలు, పేలుడు పదార్థాలు బయటపడినట్లు తెలుస్తోంది. స్వాధీనం చేసుకున్న సామగ్రిలో రెండు పిస్టళ్లు, నాలుగు మ్యాగజైన్లు, సుమారు 600 నుంచి 650 తూటాలు, రిమోట్‌ కంట్రోల్‌ పరికరాలు, బ్యాటరీలు ఉన్నట్లు సమాచారం. పేలుడు పదార్థాల స్వభావాన్ని నిర్ధారించేందుకు అధికారులు పరీక్షలు నిర్వహించగా, బాంబు నిర్వీర్య బృందాలను కూడా రంగంలోకి దింపినట్లు కథనంలో పేర్కొన్నారు. పట్టుబడిన ఇద్దరు యువకులకు పాకిస్థాన్‌కు చెందిన వ్యక్తులతో సంబంధాలు ఉన్నాయా? డ్రోన్‌ ద్వారా జారవిడిచిన ఆయుధాలను సేకరించేందుకే వారు అక్కడికి వచ్చారా? ఈ సామగ్రిని ఎవరికి చేరవేయాల్సి ఉంది? అనే కోణాల్లో పోలీసులు దర్యాప్తు చేస్తున్నారు. ఈ ఘటన వెనుక ఉగ్రదాడి కుట్ర ఉందా లేదా అన్నది ఇంకా నిర్ధారణ కాలేదు. దర్యాప్తు పూర్తయ్యాకే పూర్తి వివరాలు వెల్లడయ్యే అవకాశం ఉంది. సరిహద్దు ప్రాంతాల్లో డ్రోన్ల ద్వారా ఆయుధాలు, మాదకద్రవ్యాల అక్రమ రవాణాను అడ్డుకోవడం భద్రతా సంస్థలకు కీలక సవాలుగా మారుతోంది