మద్యం మత్తులో తప్పు చేశా.. క్షమించండి: ఆలయానికి చోరీ నగలు తిరిగి ఇచ్చిన దొంగ

ఇంటర్నెట్ డెస్క్: రెండున్నరేళ్ల క్రితం ఆలయంలో జరిగిన చోరీ.. దేవుడి ఆభరణాలు మాయం.. నిందితుడు ఎవరో తెలియక కేసు మరుగున పడిన పరిస్థితి. అయితే ఇంతకాలం తర్వాత ఊహించని పరిణామం చోటుచేసుకుంది. చోరీ చేసిన వ్యక్తే ఆభరణాలను తిరిగి ఆలయంలో వదిలి వెళ్లాడు. అంతేకాదు.. తాను చేసిన తప్పును అంగీకరిస్తూ క్షమాపణ కోరుతూ ఓ లేఖ కూడా ఉంచాడు. ఈ ఘటన రాజస్థాన్‌లోని ఝలావార్‌ జిల్లా కరల్‌ గ్రామంలోని పురాతన నరసింహ ఆలయంలో చోటుచేసుకున్నట్లు సమాచారం. ప్రసాదం అనుకున్న సంచి.. తెరిచి చూస్తే షాక్‌ ఆలయ ప్రాంగణంలో భజన కార్యక్రమాలు జరుగుతున్న సమయంలో బుధవారం ఉదయం పూజారి మోహన్‌లాల్‌ బైరాగీ ఆలయాన్ని శుభ్రం చేస్తున్నారు. ఈ క్రమంలో ఆయనకు ఓ ఆకుపచ్చ పాలిథీన్‌ సంచి కనిపించింది. భక్తులు ప్రసాదం కోసం వదిలి వెళ్లి ఉంటారని భావించిన పూజారి దానిని పక్కన పెట్టారు. అయితే అదే రోజు సాయంత్రం సుమారు 5 గంటల సమయంలో సాయంకాల పూజకు సిద్ధమవుతున్న సమయంలో ఆ సంచి మరోసారి పూజారి దృష్టికి వచ్చింది. సంచిని తెరిచి చూడగా.. రెండున్నరేళ్ల క్రితం ఆలయం నుంచి చోరీకి గురైన కిరీటం భాగాలు, వెండి ఆభరణాలు అందులో కనిపించాయి. ఆభరణాలు కొంతవరకు కరిగించిన స్థితిలో ఉండటంతో పూజారి ఆశ్చర్యపోయారు. అదే సంచిలో రూ.2 వేల నగదు, ఓ లేఖ కూడా ఉన్నట్లు గుర్తించారు. ‘జై శ్రీరామ్‌’ అంటూ లేఖ ‘జై శ్రీరామ్‌’ అంటూ ప్రారంభమైన లేఖలో.. తాను మద్యం మత్తులో పెద్ద తప్పు చేశానని, తనను క్షమించాలని దొంగ కోరినట్లు సమాచారం. చోరీ చేసిన ఆభరణాలను మరమ్మతులు చేయించేందుకు రూ.2 వేల నగదును పంపుతున్నట్లు కూడా లేఖలో పేర్కొన్నట్లు తెలుస్తోంది. ఈ విషయం గ్రామంలో తెలియడంతో పెద్ద సంఖ్యలో ప్రజలు ఆలయానికి చేరుకున్నారు. రెండున్నరేళ్ల క్రితం చోరీకి గురైన స్వామివారి ఆభరణాలు తిరిగి ఆలయానికి చేరడం, వాటిని చోరీ చేసిన వ్యక్తే స్వయంగా తిరిగి అప్పగించడంతో ఈ ఘటన స్థానికంగా చర్చనీయాంశంగా మారింది. అయితే ఆభరణాలను ఎవరు తీసుకెళ్లారు? ఇప్పుడు తిరిగి ఎందుకు ఇచ్చారు? అనే విషయాలపై స్పష్టత రావాల్సి ఉంది. ఘటనపై పోలీసులు దర్యాప్తు చేపట్టినట్లయితే, లేఖ ఆధారంగా నిందితుడిని గుర్తించే అవకాశం ఉంది.