వన్డేల్లో ఇద్దరూ ఇద్దరే.. సచిన్‌–విరాట్‌ రికార్డులపై ఆసక్తికర చర్చ

అంతర్జాతీయ వన్డే క్రికెట్‌లో 15 వేల పరుగుల మైలురాయిని దాటిన బ్యాటర్లు ఇప్పటివరకు ఇద్దరే. భారత క్రికెట్‌ దిగ్గజం సచిన్‌ టెండూల్కర్‌, ఆధునిక క్రికెట్‌ స్టార్‌ విరాట్‌ కోహ్లీ ఈ ఘనత సాధించారు. అయితే ఈ మైలురాయిని విరాట్‌ కోహ్లీ.. సచిన్‌ కంటే 74 ఇన్నింగ్స్‌లు ముందుగానే చేరుకోవడం విశేషం. ఈ గణాంకం ఆధారంగా విరాట్‌ గొప్పవాడంటూ చర్చ మొదలైనా.. సచిన్‌, విరాట్‌లను కేవలం సంఖ్యలతో పోల్చడం అంత సులభం కాదు. ఇద్దరూ తమ తమ కాలాల్లో ప్రపంచ క్రికెట్‌పై గణనీయమైన ప్రభావం చూపిన బ్యాటర్లు. ముఖ్యంగా సచిన్‌ దాదాపు రెండు దశాబ్దాలపాటు వన్డే క్రికెట్‌లో కొనసాగగా.. ఆ సమయంలో ఉన్న పరిస్థితులు, నిబంధనలు, బౌలింగ్‌ పరిస్థితులు ఇప్పటితో పోలిస్తే భిన్నంగా ఉన్నాయి. 15 వేల పరుగుల్లో విరాట్‌ వేగం గణాంకాల పరంగా చూస్తే విరాట్‌ కోహ్లీ 303 వన్డే ఇన్నింగ్స్‌ల్లోనే 15 వేల పరుగుల మార్క్‌ను అందుకున్నాడు. సచిన్‌ టెండూల్కర్‌ ఈ మైలురాయిని చేరుకోవడానికి 377 ఇన్నింగ్స్‌లు తీసుకున్నాడు. ఈ క్రమంలో విరాట్‌ తక్కువ బంతులు ఎదుర్కొంటూనే ఎక్కువ పరుగులు సాధించాడు. అతడి ఇన్నింగ్స్‌ సగటు సుమారు 49.5 కాగా.. సచిన్‌ సగటు 39.9. స్ట్రైక్‌రేట్‌లోనూ విరాట్‌ 94కు పైగా ఉండగా.. సచిన్‌ది సుమారు 86గా ఉంది. సెంచరీల విషయంలోనూ కోహ్లీ వేగం స్పష్టంగా కనిపిస్తుంది. విరాట్‌ దాదాపు ప్రతి ఆరు ఇన్నింగ్స్‌లకు ఒక శతకం సాధించిన స్థాయిలో ఉంటే.. సచిన్‌కు ఒక శతకం సాధించేందుకు సగటున 9.2 ఇన్నింగ్స్‌లు పట్టాయి. కానీ కాలం మారింది.. పరిస్థితులూ మారాయి అయితే ఈ గణాంకాలను మాత్రమే ఆధారంగా చేసుకుని ఎవరు గొప్ప బ్యాటర్‌ అనే నిర్ణయానికి రావడం సరైంది కాదు. సచిన్‌ వన్డే కెరీర్‌ ప్రారంభించినప్పటి నుంచి క్రికెట్‌ నిబంధనల్లో అనేక మార్పులు వచ్చాయి. సచిన్‌ ఆడిన 463 వన్డేల్లో ఎక్కువ కాలం 50 ఓవర్లకు ఒకే బంతి ఉపయోగించే నిబంధనే అమల్లో ఉండేది. అలాగే ఫీల్డింగ్‌ పరిమితులు, పవర్‌ప్లే నిబంధనలు కూడా ప్రస్తుత విధానంతో పోలిస్తే భిన్నంగా ఉండేవి. ప్రస్తుతం బ్యాటర్లకు అనుకూలంగా ఉండే పవర్‌ప్లే నిబంధనలు, రెండు కొత్త బంతుల వినియోగం వంటి మార్పులు వన్డే క్రికెట్‌ స్వభావాన్ని మార్చాయి. అంతేకాకుండా సచిన్‌ కెరీర్‌లో స్వింగ్‌ బౌలింగ్‌కు అనుకూలమైన పరిస్థితుల్లో రెడ్‌ బాల్‌తో కూడా కొన్ని వన్డేలు ఆడాల్సి వచ్చింది. మరోవైపు విరాట్‌ కోహ్లీ కెరీర్‌ పూర్తిగా భిన్నమైన ఆధునిక వన్డే పరిస్థితుల్లో సాగింది. రికార్డులకతీతంగా ఇద్దరి ప్రత్యేకత సచిన్‌ వన్డేల్లో 18,426 పరుగులతో అత్యధిక పరుగుల రికార్డును నెలకొల్పగా.. విరాట్‌ కోహ్లీ ఇప్పటికే వన్డేల్లో అత్యధిక సెంచరీల జాబితాలో అగ్రస్థానంలో నిలిచాడు. ఇద్దరి ఖాతాల్లోనూ సుదీర్ఘకాలం గుర్తుండిపోయే రికార్డులు ఉన్నాయి. కాబట్టి సచిన్‌–విరాట్‌ పోలికను ఒకే గణాంకంతో తేల్చడం కంటే.. వారి కాలం, నిబంధనలు, మ్యాచ్‌ పరిస్థితులు, ప్రత్యర్థుల స్థాయి, ఆటపై వారి ప్రభావం వంటి అంశాలను కూడా పరిగణనలోకి తీసుకోవాల్సి ఉంటుంది. గణాంకాలు ఇద్దరి గొప్పతనంలోని ఒక్కో కోణాన్ని చూపిస్తే.. వారి వారసత్వం మాత్రం భారత క్రికెట్‌ చరిత్రలో ప్రత్యేక స్థానాన్ని కల్పించింది.