సంగారెడ్డి: పండుగ సాయన్నకు ఎస్పీ పరితోష్ పంకజ్ నివాళులు

సంగారెడ్డి: ప్రజల కోసం పోరాడి, అన్యాయాన్ని ఎదిరించి బలహీన వర్గాలకు అండగా నిలిచిన పండుగ సాయన్న ముదిరాజ్ సేవలు చిరస్మరణీయమని సంగారెడ్డి జిల్లా ఎస్పీ పరితోష్ పంకజ్ అన్నారు. పండుగ సాయన్న ముదిరాజ్ జయంతి సందర్భంగా గురువారం జిల్లా పోలీసు కార్యాలయంలో ఆయన చిత్రపటానికి నివాళులర్పించారు. ఈ సందర్భంగా ఎస్పీ మాట్లాడుతూ.. పండుగ సాయన్న జీవితం ధైర్యం, పోరాట స్ఫూర్తి, ప్రజల పట్ల బాధ్యతకు ప్రతీకగా నిలుస్తుందని పేర్కొన్నారు. యువత అన్యాయానికి దూరంగా ఉంటూ, న్యాయం వైపు నిలబడాలని సూచించారు. సమాజంలో శాంతి, సామరస్యం, సమానత్వం పెంపొందించేందుకు ప్రతి ఒక్కరూ కృషి చేయాలని పిలుపునిచ్చారు. ప్రజల భద్రతను కాపాడటం, బలహీన వర్గాలకు అండగా నిలవడం, బాధితులకు చట్ట పరిధిలో న్యాయం అందించడం పోలీసుల ప్రధాన బాధ్యత అని ఎస్పీ స్పష్టం చేశారు. ప్రజలు చట్టాలను గౌరవిస్తూ శాంతిభద్రతల పరిరక్షణలో పోలీసులకు సహకరించాలని కోరారు. పండుగ సాయన్న జయంతి, వర్ధంతులను రాష్ట్ర ప్రభుత్వ కార్యక్రమాలుగా నిర్వహించాలని తెలంగాణ ప్రభుత్వం నిర్ణయించడం అభినందనీయమని ఆయన పేర్కొన్నారు. ఇలాంటి కార్యక్రమాల ద్వారా మహనీయుల సేవలు, పోరాట స్ఫూర్తి భావితరాలకు చేరుతాయని తెలిపారు. పండుగ సాయన్న ఆశయాలను స్మరించుకుంటూ న్యాయం, సమానత్వం, మానవత్వం వంటి విలువలను ప్రతి ఒక్కరూ ఆచరించాలని పిలుపునిచ్చారు. ఈ కార్యక్రమంలో అదనపు ఎస్పీ చైతన్య రెడ్డి, అడ్మినిస్ట్రేటివ్ అధికారి పద్మావతి, ఏఆర్ డీఎస్పీ నరేందర్, ఎస్బీ ఇన్‌స్పెక్టర్ సదా నాగరాజు, ఆర్‌ఐలు సురేష్ నాయక్, రాజశేఖర్ రెడ్డి, డానియెల్‌తో పాటు పోలీసు కార్యాలయ సిబ్బంది పాల్గొన్నారు.