సింహాచలంలో ఘనంగా సామూహిక వరలక్ష్మీ వ్రతాలు.. నాలుగు విడతల్లో నిర్వహణ

విశాఖపట్నంలోని సింహాచలం క్షేత్రంలో సామూహిక వరలక్ష్మీ వ్రతాలు ఘనంగా ప్రారంభమయ్యాయి. ఈవో జల్లేపల్లి వెంకట్రావు ఆధ్వర్యంలో, స్పెషల్ డిప్యూటీ కలెక్టర్ మధులత పర్యవేక్షణలో వ్రత కార్యక్రమాలకు శ్రీకారం చుట్టారు. వేద పండితులు, అర్చక స్వాముల వేద మంత్రోచ్చారణల మధ్య ప్రత్యేక పూజా కార్యక్రమాలు ప్రారంభమయ్యాయి. ఆలయ ప్రధాన అర్చకుల ఆధ్వర్యంలో తొలి విడత పూజలు నిర్వహించారు. మొదటి బ్యాచ్‌లో పెద్ద సంఖ్యలో మహిళా భక్తులు పాల్గొని భక్తిశ్రద్ధలతో వరలక్ష్మీ వ్రతాన్ని ఆచరించారు. ఈ సందర్భంగా ప్రధాన అర్చకులు వరలక్ష్మీ వ్రతం విశిష్టతను, పూజా విధానాన్ని వివరించి కార్యక్రమాన్ని ప్రారంభించారు. భక్తులకు ఎలాంటి ఇబ్బందులు కలగకుండా దేవస్థానం అధికారులు ప్రత్యేక ఏర్పాట్లు చేశారు. సామూహిక వరలక్ష్మీ వ్రతాలను మొత్తం నాలుగు విడతల్లో నిర్వహించేలా ఏర్పాట్లు చేశారు. భక్తుల సౌకర్యార్థం వారికి కేటాయించిన సమయం, వేదిక వివరాలను ముందుగానే ఎస్‌ఎంఎస్‌ ద్వారా తెలియజేశారు. సామూహిక వ్రతాల నిర్వహణతో సింహాచలం క్షేత్రంలో ఆధ్యాత్మిక వాతావరణం నెలకొంది. మహిళా భక్తులు పెద్ద సంఖ్యలో పాల్గొనడంతో ఆలయ ప్రాంగణంలో సందడి కనిపించింది.