కేనరీ ఐలాండ్స్‌ సమీపంలో ఘోర పడవ ప్రమాదం.. 83 మంది మృతి?

స్పెయిన్‌ కేనరీ ఐలాండ్స్‌ సమీపంలోని అట్లాంటిక్‌ సముద్రంలో వలస కార్మికులతో వెళ్తున్న పడవ ప్రమాదానికి గురైంది. ఈ ఘటనలో సుమారు 83 మంది ప్రాణాలు కోల్పోయినట్లు మైగ్రెంట్‌ రైట్స్‌ గ్రూప్‌ ‘వాకింగ్‌ బోర్డర్స్‌’ వ్యవస్థాపకురాలు హెలీనా మలేనో వెల్లడించారు. మృతుల్లో ముగ్గురు మహిళలు, ఒక చిన్నారి ఉన్నట్లు ఆమె తెలిపారు. అయితే ఈ సంఖ్యపై స్పెయిన్‌ అధికారులు ఇంకా అధికారిక ధ్రువీకరణ ఇవ్వలేదు. ఇప్పటివరకు ఐదు మృతదేహాలు మాత్రమే లభ్యమైనట్లు అధికారులు వెల్లడించారు. ప్రమాదానికి గురైన పడవ నుంచి ముగ్గురు గాయపడిన వారిని విమానం ద్వారా సమీపంలోని ఆస్పత్రికి తరలించారు. మరో 41 మందిని సురక్షితంగా ఒడ్డుకు చేర్చి పోర్టుకు తరలించినట్లు స్పెయిన్‌ అధికారులు తెలిపారు. అక్కడ వారికి రెడ్‌క్రాస్‌ సిబ్బంది వైద్య సహాయం అందిస్తున్నారు. రక్షించిన వారిలో పలువురి ఆరోగ్య పరిస్థితి ఆందోళనకరంగా ఉన్నట్లు సమాచారం. నెల రోజుల సముద్ర ప్రయాణం రెడ్‌క్రాస్‌ ప్రతినిధి ప్రకారం.. ప్రమాదానికి గురైన పడవలోని వలసదారులు మాలి, సెనెగల్‌ దేశాలకు చెందినవారు. ప్రత్యక్ష సాక్షుల కథనం ప్రకారం, పడవ గాంబియా నుంచి బయలుదేరి దాదాపు నెల రోజుల పాటు సముద్ర ప్రయాణం చేసింది. ఈ క్రమంలో ఆహారం, తాగునీరు పూర్తిగా అయిపోవడంతో ప్రయాణికులు తీవ్ర ఇబ్బందులు ఎదుర్కొన్నట్లు వారు తెలిపారు. పడవ బయలుదేరిన సమయంలో 100 మందికి పైగా ప్రయాణికులు ఉన్నారని, వారిలో మహిళలు, చిన్నారులు కూడా ఉన్నారని ప్రత్యక్ష సాక్షులు పేర్కొన్నారు. దీర్ఘకాలిక ప్రయాణం, తగిన ఆహారం, నీరు, వైద్య సదుపాయాలు లేకపోవడంతో ప్రయాణికులు తీవ్రంగా బలహీనపడ్డారని తెలిపారు. ప్రయాణం మధ్యలో కొందరు మరణించారని, వారి మృతదేహాలను సముద్రంలోకి వదిలేశారని వారు ఆరోపించారు. అయితే ఈ వివరాలపై స్పెయిన్‌ అధికారుల నుంచి పూర్తి స్థాయి ధ్రువీకరణ రావాల్సి ఉంది. అధిక రద్దీ.. ప్రమాదానికి కారణమా? పడవలో ప్రయాణికుల సంఖ్య అధికంగా ఉండటంతో పాటు, నెల రోజుల పాటు సాగిన ప్రమాదకర సముద్ర ప్రయాణం కూడా ఈ విషాదానికి కారణమై ఉండొచ్చనే అనుమానాలు వ్యక్తమవుతున్నాయి. కేనరీ ఐలాండ్స్‌ చేరుకునేందుకు పశ్చిమ ఆఫ్రికా నుంచి సముద్ర మార్గాన్ని ఎంచుకునే వలసదారులకు ఈ మార్గం అత్యంత ప్రమాదకరమైనదిగా పరిగణిస్తారు. ప్రతికూల సముద్ర పరిస్థితులు, చిన్న పడవలు, అధిక రద్దీ, సరిపడా ఆహారం–నీటి లభ్యత లేకపోవడం వంటి కారణాలతో ఈ మార్గంలో గతంలోనూ అనేక విషాద ఘటనలు చోటుచేసుకున్నాయి. ఈ నేపథ్యంలో తాజా ప్రమాదం మరోసారి అక్రమ, ప్రమాదకర వలస మార్గాలపై ఆందోళనను పెంచుతోంది. ప్రస్తుతం గల్లంతైన వారి కోసం స్పెయిన్‌ సహాయక బృందాలు గాలింపు చర్యలు కొనసాగిస్తున్నాయి. మృతుల సంఖ్యపై వలస హక్కుల సంస్థలు చెబుతున్న లెక్కలు, అధికారికంగా లభించిన మృతదేహాల సంఖ్య మధ్య వ్యత్యాసం ఉండటంతో.. పూర్తి వివరాలు సహాయక చర్యలు పూర్తయిన తర్వాతే స్పష్టమయ్యే అవకాశం ఉంది.