ఏటీసీ విద్యార్థులకు ఉద్యోగాలు.. గర్వకారణం: సీఎం రేవంత్‌రెడ్డి

హైదరాబాద్‌, సెప్టెంబరు 30: రాష్ట్రంలోని అడ్వాన్స్‌డ్‌ టెక్నాలజీ సెంటర్స్‌ (ఏటీసీ)లో నైపుణ్య శిక్షణ పొందిన విద్యార్థులు జాతీయ, అంతర్జాతీయ స్థాయి సంస్థల్లో ఉద్యోగాలు సాధించడం గర్వకారణమని ముఖ్యమంత్రి రేవంత్‌రెడ్డి అన్నారు. ‘ప్లేస్‌మెంట్లలో ఏటీసీల హవా’ శీర్షికతో బుధవారం ప్రచురితమైన కథనంపై సీఎం స్పందించారు. ఈ సందర్భంగా ఆ వార్తా కథనానికి సంబంధించిన క్లిప్పింగ్‌ను తన ఎక్స్‌ ఖాతాలో షేర్‌ చేశారు. పారిశ్రామిక రంగంలో వేగంగా చోటుచేసుకుంటున్న మార్పులకు అనుగుణంగా యువతకు అవసరమైన నైపుణ్యాలను అందించడమే ప్రభుత్వ లక్ష్యమని రేవంత్‌రెడ్డి పేర్కొన్నారు. పరిశ్రమలకు అవసరమైన నైపుణ్యాలు కలిగిన మానవ వనరులను తయారు చేయడంపై ప్రభుత్వం దృష్టి సారిస్తోందని తెలిపారు. ఇందులో భాగంగా టాటా టెక్నాలజీస్‌ భాగస్వామ్యంతో రాష్ట్రంలోని ఐటీఐలను అడ్వాన్స్‌డ్‌ టెక్నాలజీ సెంటర్స్‌గా అప్‌గ్రేడ్‌ చేయడం ద్వారా ఆధునిక సాంకేతిక నైపుణ్యాలపై శిక్షణ అందించే దిశగా చర్యలు చేపట్టినట్లు సీఎం వివరించారు. ఏటీసీల్లో శిక్షణ పొందిన విద్యార్థులకు వివిధ సంస్థల్లో ఉద్యోగ అవకాశాలు లభించడం ఈ కార్యక్రమం ద్వారా ఏర్పడుతున్న ఉపాధి అవకాశాలకు సంబంధించిన పరిణామంగా ప్రభుత్వం పేర్కొంటోంది. పరిశ్రమల అవసరాలకు అనుగుణంగా శిక్షణ, నైపుణ్యాభివృద్ధిని అనుసంధానించడం ద్వారా యువతకు మెరుగైన ఉద్యోగ అవకాశాలు కల్పించాలనే లక్ష్యంతో ప్రభుత్వం ఈ కార్యక్రమాన్ని కొనసాగిస్తోంది.