అలిపిరి మెట్ల మార్గంలో ఇక రోబో డాగ్ నిఘా.. టీటీడీ నూతన ప్రయత్నం

తిరుమలలో భక్తుల రద్దీ రోజురోజుకూ పెరుగుతున్న నేపథ్యంలో.. భక్తుల భద్రతతో పాటు అటవీ ప్రాంతాల్లో వన్యప్రాణుల కదలికలను పర్యవేక్షించేందుకు టీటీడీ సాంకేతికతను మరింత విస్తృతంగా వినియోగించేందుకు సిద్ధమవుతోంది. ఇందులో భాగంగా రోబో డాగ్‌ను అందుబాటులోకి తీసుకురావడంపై దృష్టి సారించింది. ముఖ్యంగా అలిపిరి–తిరుమల కాలిబాటకు ఆనుకుని ఉన్న అటవీ ప్రాంతాల్లో చిరుతలు, ఇతర వన్యప్రాణుల సంచారాన్ని ముందుగానే గుర్తించి భక్తులను అప్రమత్తం చేయడమే లక్ష్యంగా కనిపిస్తోంది. ఇటీవల తిరుమలలో భక్తుల రద్దీ గణనీయంగా నమోదైంది. బుధవారం ఒక్కరోజే 76,464 మంది భక్తులు శ్రీవారిని దర్శించుకున్నారు. వీరిలో 36,913 మంది తలనీలాలు సమర్పించి మొక్కులు చెల్లించుకున్నారు. హుండీ ద్వారా రూ.4.94 కోట్ల కానుకలు సమకూరాయి. వైకుంఠం క్యూ కాంప్లెక్స్‌లోని అన్ని కంపార్టుమెంట్లు నిండిపోవడంతో శిలాతోరణం వరకు క్యూ లైన్ కొనసాగింది. టోకెన్లు లేని సర్వదర్శనం భక్తులకు దర్శనానికి 18 నుంచి 20 గంటల సమయం పట్టింది. అదే రోజు 4.27 లక్షల లడ్డూలు విక్రయించగా.. 2.63 లక్షల మంది అన్నప్రసాదాన్ని స్వీకరించారు. వివిధ అనారోగ్య కారణాలతో 3,494 మంది భక్తులు శ్రీవారి వైద్య సేవలను పొందారు. రద్దీని దృష్టిలో ఉంచుకుని క్యూ కాంప్లెక్సులు, క్యూ లైన్లు, నారాయణగిరి షెడ్ల వద్ద టీటీడీ అధికారులు ప్రత్యేక ఏర్పాట్లు చేశారు. వన్యప్రాణుల కదలికలపై రోబో నిఘా భక్తుల రద్దీతో పాటు తిరుమల అటవీ ప్రాంతాల్లో వన్యప్రాణుల సంచారం కూడా టీటీడీకి కీలక అంశంగా మారింది. ఈ నేపథ్యంలో ఆధునిక సాంకేతిక పరిజ్ఞానాన్ని వినియోగించి నిఘా వ్యవస్థను మరింత బలోపేతం చేయాలని నిర్ణయించింది. ఇందులో భాగంగా తీసుకురానున్న క్వాడ్రుపెడ్ రోబో పనితీరును టీటీడీ అదనపు ఈవో సీహెచ్ వెంకయ్య చౌదరి పరిశీలించారు. తిరుమల పద్మావతి అతిథి గృహం వద్ద రోబో పనితీరు, దాని ద్వారా సాధ్యమయ్యే వినియోగాలపై అధికారులు ఆరా తీశారు. మనుషులు వెళ్లేందుకు ప్రమాదకరంగా ఉండే అటవీ ప్రాంతాల్లో వన్యప్రాణుల కదలికలను పర్యవేక్షించేందుకు ఈ రోబోను వినియోగించే అవకాశాలను పరిశీలిస్తున్నారు. ఇందులో ఆప్టికల్ కెమెరా, థర్మల్ ఇమేజింగ్ కెమెరా, 360 డిగ్రీల లైడార్, వివిధ రకాల సెన్సార్లు, ఆర్టిఫిషియల్ ఇంటెలిజెన్స్ టూల్స్ అమర్చారు. దీంతో చీకటి, పొగమంచు వంటి ప్రతికూల పరిస్థితుల్లోనూ వన్యప్రాణుల కదలికలను గుర్తించే అవకాశం ఉంటుంది. అంతేకాకుండా వన్యప్రాణులు, మనుషులు, వాహనాలు, పశువులను గుర్తించి వర్గీకరించే సామర్థ్యం కూడా ఈ వ్యవస్థకు ఉంది. చిరుత కనిపిస్తే.. వెంటనే అలర్ట్ రోబో డాగ్ వన్యప్రాణుల కదలికలను గుర్తించిన వెంటనే జియో ట్యాగ్‌డ్ అలర్ట్‌ను పంపించే విధంగా వ్యవస్థను వినియోగించే అవకాశం ఉంది. అదే సమయంలో లైవ్ వీడియో, థర్మల్ ఫీడ్‌ను కంట్రోల్ రూమ్‌తో పాటు పెట్రోలింగ్ సిబ్బందికి అందించవచ్చు. అలిపిరి–తిరుమల కాలిబాటకు ఆనుకుని ఉన్న అటవీ ప్రాంతాల్లో చిరుతలు లేదా ఇతర వన్యప్రాణుల సంచారం ముందుగానే గుర్తిస్తే.. భక్తులను వేగంగా అప్రమత్తం చేయడానికి ఇది ఉపయోగపడే అవకాశం ఉంది. వన్యప్రాణులు భక్తుల రాకపోకలు జరిగే ప్రాంతాల వైపు వచ్చిన సందర్భాల్లో రోబోలోని సౌండ్, లైట్ యూనిట్లను ఉపయోగించి వాటిని తిరిగి అటవీ ప్రాంతం వైపు మళ్లించే అవకాశాన్ని కూడా అధికారులు పరిశీలిస్తున్నారు. ఇప్పటికే ఉన్న నిఘా వ్యవస్థకు అదనంగా.. రోబో డాగ్‌ను ప్రస్తుతం అమల్లో ఉన్న కెమెరా ట్రాప్‌లు, ఫుట్ పెట్రోలింగ్, అటవీ సిబ్బంది నిఘాకు ప్రత్యామ్నాయంగా కాకుండా.. వాటికి అదనంగా పనిచేసే మొబైల్ మానిటరింగ్ వ్యవస్థగా వినియోగించే అవకాశం ఉంది. వన్యప్రాణుల కదలికలు ఎక్కువగా ఉన్న ప్రాంతాల్లో అవసరాన్ని బట్టి రోబోను వేగంగా మోహరించవచ్చు. దీని ద్వారా సేకరించే వీడియోలు, థర్మల్ చిత్రాలు, ఇతర డేటాను విశ్లేషించడం ద్వారా వన్యప్రాణుల సంచారంపై మరింత స్పష్టమైన అవగాహన పొందే అవకాశం ఉంటుంది. దీంతో వన్యప్రాణుల కదలికలు ఎక్కువగా నమోదయ్యే ప్రాంతాలను గుర్తించి.. అక్కడ పెట్రోలింగ్‌ను పెంచడం, నిఘాను మరింత కట్టుదిట్టం చేయడం వంటి చర్యలను టీటీడీ చేపట్టవచ్చు. మొత్తంగా చూస్తే.. తిరుమలలో భక్తుల భద్రతను కేవలం సంప్రదాయ నిఘా వ్యవస్థలకే పరిమితం చేయకుండా, ఆర్టిఫిషియల్ ఇంటెలిజెన్స్, థర్మల్ ఇమేజింగ్, లైడార్, రోబోటిక్స్ వంటి ఆధునిక సాంకేతికతను జోడించడం టీటీడీ తీసుకుంటున్న కీలక ముందడుగుగా చెప్పవచ్చు. ముఖ్యంగా అలిపిరి మెట్ల మార్గం, అటవీ ప్రాంతాల్లో వన్యప్రాణుల కదలికలను ముందుగానే గుర్తించగలిగితే.. భక్తుల భద్రత విషయంలో ఇది అదనపు రక్షణ వ్యవస్థగా ఉపయోగపడే అవకాశం ఉంది.