భారత్ తరఫున ఆడే ప్రతి నిమిషాన్నీ ఆస్వాదిస్తున్నా: విరాట్ కోహ్లీ

ఇంటర్నెట్ డెస్క్: వెస్టిండీస్‌తో జరిగిన తొలి వన్డేలో విరాట్ కోహ్లీ మరోసారి తన బ్యాట్‌తో మెరిశాడు. అజేయ శతకంతో జట్టు విజయంలో కీలక పాత్ర పోషించిన కోహ్లీ.. మ్యాచ్ అనంతరం తన ఆట, ఫిట్‌నెస్, 2027 వన్డే ప్రపంచకప్ లక్ష్యం గురించి ఆసక్తికర విషయాలను వెల్లడించాడు. వ్యక్తిగత రికార్డులు, మైలురాళ్ల కంటే మ్యాచ్ పరిస్థితికి అనుగుణంగా ఆడి జట్టుకు ఉపయోగపడటమే తన ప్రధాన లక్ష్యమని కోహ్లీ చెప్పాడు. జట్టు అవసరాలకు అనుగుణంగా ఆడుతున్నప్పుడు వ్యక్తిగత విజయాలు సహజంగానే వస్తాయని పేర్కొన్నాడు. ఇంతకాలం అంతర్జాతీయ క్రికెట్‌లో కొనసాగుతూ ఈ స్థాయికి రావడం తనకు ఆనందంగా, అదృష్టంగా ఉందని కోహ్లీ తెలిపాడు. కష్టపడి పనిచేయడం, తన పని తాను చేసుకుంటూ ముందుకు సాగడం, వచ్చిన అవకాశాలకు కృతజ్ఞతగా ఉండటం తన విధానమని వివరించాడు. “చాలామంది భారత జట్టుకు ఆడాలని కోరుకుంటారు. కానీ ఆ అవకాశం కొద్దిమందికే దక్కుతుంది. అందుకే లభించిన ప్రతి అవకాశాన్ని సద్వినియోగం చేసుకోవాలి. భారత్ తరఫున ఆడుతున్న ప్రతి నిమిషాన్నీ నేను ఆస్వాదిస్తున్నా” అని కోహ్లీ పేర్కొన్నాడు. యువ ఆటగాళ్లకు ఫిట్‌నెస్‌పై సూచన ప్రస్తుతం క్రికెట్‌లోకి వస్తున్న యువ ఆటగాళ్లు ఫిట్‌నెస్‌పై నిరంతరం దృష్టి పెట్టాలని కోహ్లీ సూచించాడు. ఎంత గుర్తింపు, కీర్తి, అభిమానుల ప్రేమ వచ్చినా.. తాము ఎక్కడి నుంచి వచ్చామనే విషయాన్ని మర్చిపోకూడదని చెప్పాడు. తమ ప్రయాణాన్ని అప్పుడప్పుడు వెనక్కి తిరిగి చూసుకోవడం కూడా ఎంతో అవసరమని కోహ్లీ అభిప్రాయపడ్డాడు. విజయాలు వచ్చినప్పుడు మూలాలను మర్చిపోవడం సులభమని, కానీ గతాన్ని గుర్తు చేసుకుంటే ముందుకు వెళ్లేందుకు అవసరమైన స్ఫూర్తి లభిస్తుందని వివరించాడు. ప్రపంచకప్‌ లక్ష్యంపై స్పష్టత 2027 వన్డే ప్రపంచకప్‌కు ఇంకా సమయం ఉన్నప్పటికీ.. తన లక్ష్యం మాత్రం స్పష్టంగా ఉందని కోహ్లీ చెప్పాడు. ప్రతి మ్యాచ్‌లో తన ఆటలోని వివిధ అంశాలను మెరుగుపరుచుకోవడంపై దృష్టి పెడతానని తెలిపాడు. బ్యాటింగ్‌తో పాటు ఫిట్‌నెస్‌ను కూడా కొనసాగించాల్సిన అవసరం ఉందని పేర్కొన్నాడు. ముఖ్యంగా చివరి 15 ఓవర్లలో బౌండరీల మధ్య వేగంగా పరుగులు తీయడం, ఇన్నర్‌ రింగ్‌లో ఫీల్డింగ్‌ చేసేటప్పుడు అదే స్థాయి తీవ్రతను కొనసాగించడం వంటి అంశాలపై దృష్టి పెట్టాలని వివరించాడు. ప్రతి మ్యాచ్‌లో ఒత్తిడికి లోనుకాకుండా సానుకూలంగా ఆడాలని నిర్ణయించుకున్నట్లు కోహ్లీ చెప్పాడు. అయితే సానుకూల దూకుడు, నిర్లక్ష్యం మధ్య చాలా సన్నని తేడా ఉంటుందని.. అనుభవజ్ఞుడైన ఆటగాడిగా ఆ తేడాను అర్థం చేసుకుని ఆడాల్సి ఉంటుందని వివరించాడు. తన వ్యక్తిగత ప్రదర్శన కంటే జట్టును విజయపథంలో నడిపించడమే ప్రధాన ఉద్దేశమని స్పష్టం చేస్తూ.. రాబోయే మ్యాచ్‌ల్లోనూ ఇదే విధానాన్ని కొనసాగించాలనే సంకేతాలను కోహ్లీ ఇచ్చాడు.