స్థానిక సంస్థల ఎన్నికలపై షర్మిల ఫోకస్.. 8 మందితో మానిటరింగ్ కమిటీ ఏర్పాటు

విజయవాడ, సెప్టెంబరు 11: ఆంధ్రప్రదేశ్‌లో జరగనున్న స్థానిక సంస్థల ఎన్నికల్లో కాంగ్రెస్ పార్టీని బలోపేతం చేసేందుకు ఏపీసీసీ అధ్యక్షురాలు వైఎస్ షర్మిలా రెడ్డి చర్యలు ప్రారంభించారు. ఎన్నికల ప్రక్రియను సమన్వయం చేయడంతో పాటు అభ్యర్థుల ఎంపిక, పార్టీ విధివిధానాల అమలు వంటి అంశాలను పర్యవేక్షించేందుకు 8 మందితో రాష్ట్ర స్థాయి మానిటరింగ్ కమిటీని ఏర్పాటు చేశారు. ఈ కమిటీకి సీడబ్ల్యూసీ సభ్యుడు రఘువీరారెడ్డిని చైర్మన్‌గా నియమించారు. స్థానిక సంస్థల ఎన్నికల్లో కాంగ్రెస్ మెజారిటీ స్థానాలను సాధించేలా పార్టీ శ్రేణులను సమన్వయం చేయాలని కమిటీకి షర్మిలా దిశానిర్దేశం చేశారు. స్థానిక ఎన్నికలకు సంబంధించిన విధివిధానాలు, అభ్యర్థుల ఎంపిక, ఎన్నికల వ్యూహం, ఇతర సమన్వయ అంశాలను మానిటరింగ్ కమిటీ పర్యవేక్షించనుంది. జిల్లా, నగర కాంగ్రెస్ అధ్యక్షులు కమిటీతో సమన్వయం చేసుకుంటూ ఎన్నికల కార్యక్రమాలను ముందుకు తీసుకెళ్లాలని షర్మిలా ఆదేశించారు. కమిటీ సభ్యులుగా సీనియర్ నేతలు మానిటరింగ్ కమిటీ కన్వీనర్‌గా మాజీ కేంద్రమంత్రి, ఏపీసీసీ వర్కింగ్‌ ప్రెసిడెంట్‌ జేడీ శీలంను నియమించారు. సీడబ్ల్యూసీ సభ్యుడు గిడుగు రుద్రరాజుతో పాటు మాజీ కేంద్ర మంత్రులు పల్లం రాజు, కిల్లి కృపారాణి, పీసీసీ వర్కింగ్‌ ప్రెసిడెంట్‌ మస్తాన్‌ వలి, మాజీ రాజ్యసభ సభ్యుడు, ముఖ్య అధికార ప్రతినిధి తులసిరెడ్డిని కమిటీ సభ్యులుగా నియమించారు. స్థానిక సంస్థల ఎన్నికలకు సంబంధించి సోషల్‌ మీడియా, ఎన్నికల కో-ఆర్డినేషన్‌ ఇన్‌చార్జిగా కాంగ్రెస్ అధికార ప్రతినిధి, నెల్లూరు డీసీసీ అధ్యక్షుడు కిరణ్‌ కుమార్‌ రెడ్డిని నియమించారు. కమిటీ ఏర్పాటు ద్వారా స్థానిక స్థాయిలో పార్టీ కార్యకలాపాలను మరింత సమన్వయంతో నడిపించడంతో పాటు, ఎన్నికల సమయంలో అభ్యర్థుల ఎంపిక నుంచి ప్రచారం వరకు పార్టీ వ్యవస్థను పర్యవేక్షించే ప్రయత్నంగా ఈ చర్యను చూడవచ్చు.